Yaponiyaning Aiti va Nagoya shaharlarida bo‘lib o‘tayotgan Paraosiyo o‘yinlarida O‘zbekiston terma jamoasi ajoyib natijalarni namoyish etib, umumiy hisobda 101 ta medalga sazovor bo‘ldi. Sportchilarimiz jami 32 ta oltin, 35 ta kumush va 34 ta bronza medallarini qo‘lga kiritib, mamlakat sport tarixida muhim sahifa ochishdi.

Musobaqaning eng yorqin lahzalaridan biri ayollar o‘rtasida paralimpiya pauerlifting bahslariga to‘g‘ri keldi. Roza Kuziyeva 152 kilogramm og‘irlikdagi shtangani bo‘ysundirib, nafaqat oltin medalni qo‘lga kiritdi, balki jahon rekordini ham yangiladi. Yengil atletika bahslarida ham sportchilarimiz yuqori salohiyatni ko‘rsatib, bir nechta rekordlarni qayd etishdi.

Xususan, Shahinaxon Yigitaliyeva F46 sinfida nayza uloqtirish bo‘yicha 44,99 metr natija ko‘rsatib, Paraosiyo o‘yinlari rekordini o‘rnatdi. Ushbu yo‘nalishda yana bir hamyurtimiz Husnoraxon Qudratullayeva 41,91 metr natija bilan kumush medalga sazovor bo‘ldi. Shuningdek, Barotjon Baxtiyorov, Doston Qahhorov, Boburjon Omonov va Qudratilloxon Ma’rufxo‘jayevlar ham o‘z yo‘nalishlarida oltin medallarni qo‘lga kiritib, musobaqa rekordlarini yangilashdi.

Para-suzish bo‘yicha Yegor Bolotov 100 metrga chalqancha suzish bahslarida 58,43 soniya natija ko‘rsatib, Osiyo rekordini o‘rnatdi. Shuningdek, para-dzyudo, para-taekvondo va boshqa sport turlari vakillari ham delegatsiya g‘aznasiga qimmatli medallarni qo‘shishdi. 22-oktabr holatiga ko‘ra, O‘zbekiston umumjamoa hisobida ikkinchi o‘rinni egallab turibdi va musobaqalar davom etmoqda.

Source: podrobno.uz