Huquqni muhofaza qiluvchi idoralar tomonidan o'tkazilgan tezkor tadbirlar davomida navbatdagi qonunbuzarlik holati aniqlandi. Buxoro viloyat bojxona boshqarmasining kontrabandaga qarshi kurashish bo'limi xodimlari boshqa mutasaddi idoralar bilan hamkorlikda Vobkent tumanida maxsus tadbir tashkil etishdi.

Oldindan tezkor kuzatuvga olingan shaxsning yashash xonadoni belgilangan tartibda ko'zdan kechirildi. Natijada, har biri 2 ming so'mlik bo'lgan jami 1 516 dona qalbaki banknotalar hamda ularni tayyorlashda foydalanilgan bir dona rangli printer topib olindi. Mutaxassislarning dastlabki hisob-kitoblariga ko'ra, musodara qilingan qalbaki banknotalarning umumiy nominal qiymati 3 million 32 ming so'mni tashkil etadi.

Shuning bilan birga, tintuv jarayonida faqatgina soxta pul yasalishi bilan cheklanib qolmay, balki og'irligi 284,71 gramm bo'lgan marixuanaga o'xshash modda hamda parvarishlab kelingan 7 tup kannabis o'simligi borligi ham aniqlangan. Ushbu topilmalar ashyoviy dalil sifatida rasmiylashtirib olindi.

Mazkur holat yuzasidan bojxona organlari tomonidan tegishli moddalar bilan jinoyat ishi qo'zg'atildi. Hozirgi vaqtda barcha holatlarga oydinlik kiritish maqsadida tergov harakatlari jadal davom ettirilmoqda.

Source: kun.uz