Farg‘ona shahridagi bir nechta maktabgacha ta’lim tashkilotlari tarbiyalanuvchilari orasida oziq-ovqatdan zaharlanish alomatlari qayd etildi. Bu haqda Oziq-ovqat mahsulotlari xavfsizligi qo‘mitasi rasmiy ravishda ma’lumot tarqatdi, deb yozadi Sof.uz nashri. Ma’lum bo‘lishicha, mazkur ko‘ngilsiz holat 2-, 7- va 47-sonli davlat bog‘chalari tarbiyalanuvchilarini qamrab olgan.

Jabrlangan bolalar tana haroratining keskin ko‘tarilishi, qorin qismida kuchli og‘riq, umumiy holsizlik, ko‘ngil aynishi hamda ich ketishi kabi shikoyatlar bilan Farg‘ona viloyati yuqumli kasalliklar shifoxonasiga murojaat qilishgan. 26-oktabr kuni soat 11:00 holatiga ko‘ra, ulardan 28 nafari shifoxonaning yuqumli kasalliklar bo‘limida davolanmoqda. Mutaxassislarning bildirishicha, kichik bemorlarning umumiy ahvoli hozircha barqaror bo‘lib, og‘ir ahvoldagilar qayd etilmagan.

Shuningdek, tibbiy ko‘riklardan so‘ng ahvoli qoniqarli deb baholangan 23 nafar bolaga zarur tibbiy tavsiyalar berilib, ular uyiga ruxsat etilgan. Dastlabki epidemiologik surishtiruvlar davomida bog‘chalarda bolalar iste’mol qilgan oziq-ovqat mahsulotlari, tayyor taomlar, xususan, nonushta, tushlik va kechki ovqatlar menyusi hamda ularni yetkazib beruvchi mas’ul korxonalar aniqlashtirilgan. Laboratoriya tahlillari uchun taomlardan tegishli bakteriologik namunalar olingan.

Hozirgi vaqtda mazkur holat yuzasidan barcha zarur epidemiologik surishtiruvlar va laboratoriya tekshiruv ishlari davom ettirilmoqda. Eslatib o‘tamiz, mamlakatda maktabgacha ta’lim muassasalarida oziq-ovqat xavfsizligi bilan bog‘liq muammolar ilk bor kuzatilayotgani yo‘q. Avvalroq, 2025-yilning sentabr oyida Toshkent viloyatining bir nechta tumanlaridagi bog‘chalarda ham ommaviy zaharlanish yuz berib, 1900 nafardan ortiq bola shifokorlarga murojaat qilgani aniqlangan edi.

Source: www.gazeta.uz