O‘zbekistonda aholiga ko‘rsatiladigan kafolatlangan tibbiy yordam hajmini yanada kengaytirish va dori-darmon hamda diagnostika turlarini ko‘paytirish rejalashtirilmoqda. Joriy yilning 27-oktabr kuni “Ko‘ksaroy” qarorgohida mamlakat rahbari Shavkat Mirziyoyev raisligida sog‘liqni saqlash va farmatsevtika sohasi xodimlari bilan muhim uchrashuv bo‘lib o‘tdi. Mazkur muloqot davomida sohada amalga oshirilayotgan islohotlar, erishilgan natijalar hamda kelgusidagi ustuvor vazifalar atroflicha muhokama qilindi.
Prezidentning ta’kidlashicha, 2027-yildan boshlab davlat tomonidan kafolatlangan tibbiy yordam paketi doirasida beriladigan bepul dori vositalari soni bosqichma-bosqich 73 taga, tibbiy tekshiruv turlari esa 36 taga yetkaziladi. Hozirgi kunda poliklinikalarda 69 nomdagi dori vositalari yetkazib berilayotgan bo‘lib, ularning bir qismi reimbursatsiya dasturi doirasida taqdim etilmoqda. Shuningdek, mamlakatda xavfli o‘smalar, shu jumladan oshqozon, yo‘g‘on ichak, prostata bezi va o‘pka saratonini erta bosqichda aniqlash ishlari dastlab Samarqand viloyatida boshlanib, 2028-yildan e’tiboran respublikaning barcha hududlariga tatbiq etilishi ma’lum qilindi. Ushbu yo‘nalishga har yili 700 milliard so‘m mablag‘ yo‘naltirilishi ko‘zda tutilgan.
Shuningdek, infarkt va insult kasalliklarini erta aniqlash hamda davolash bo‘yicha bir qator hududlarda sinovdan o‘tkazilayotgan dastur yuqori samara berayotgani qayd etildi. Xususan, so‘nggi oy va haftalar davomida ushbu kasalliklarning dastlabki bosqichlarida o‘lim ko‘rsatkichi sezilarli darajada kamaygan. Kelgusi yilda mazkur dasturga 280 milliard so‘m ajratilib, uning qamrovi respublikaning barcha tuman va shaharlariga kengaytiriladi. Shuningdek, sog‘liqni saqlashning birlamchi bo‘g‘inini isloh qilish va xalqning poliklinikalarga bo‘lgan ishonchini oshirish borasidagi ishlar davom ettirilishi urg‘ulandi.
Source: www.gazeta.uz