O'zbekiston hukumati Buxoro shahrida yangi xalqaro aeroport qurilishi uchun davlat-xususiy sheriklik (DxS) modeli asosida tender e'lon qilganligini ma'lum qildi. Yangi aeroport majmuasi Buxoro tumanidagi Kumsulton massivida barpo etilishi rejalashtirilgan bo'lib, u ichki va xalqaro reyslarni qamrab oladigan muhim transport markaziga aylanishi kutilmoqda.

Uzbekistan Airports matbuot xizmatining ma'lumotlariga ko'ra, xususiy sherik yo'lovchi terminalini qurish va keyinchalik uni boshqarish mas'uliyatini o'z zimmasiga oladi, aerodrom infratuzilmasi esa davlat nazoratida qoladi. Loyiha doirasida 48,5 ming kvadrat metr maydonga ega bo'lgan yo'lovchi terminali qurilishi ko'zda tutilgan bo'lib, uning quvvati soatiga 1200 xalqaro va 400 ichki yo'lovchini tashish imkoniyatiga ega bo'ladi.

Loyihada, shuningdek, katering binosi, avtoturargohlar, yuk maydonchalari va 8000 kubometr sig'imga ega yoqilg'i quyish majmuasi qurilishi ham rejalashtirilgan. Hozirgi "Buxoro" xalqaro aeroporti 2025 yilda 574 036 yo'lovchini qabul qilgan bo'lib, yo'lovchilar oqimining asosiy qismini xalqaro reyslar tashkil etgan.

Tenderda qatnashish uchun shunga o'xshash infratuzilma loyihalarini amalga oshirish tajribasiga ega kompaniyalar taklif qilinmoqda. Yangi aeroportning qurilishi mintaqaning iqtisodiy rivojlanishiga, turizm sohasining o'sishiga va transport aloqalarining yaxshilanishiga hissa qo'shishi kutilmoqda.

Source: kun.uz