Prezident Shavkat Mirziyoyev kosmosga sun'iy yo'ldosh uchirish bo'yicha dastlabki ishlar taqdimotini ko'rib chiqdi. Taqdimot davomida ilmiy-texnologik salohiyatni oshirish doirasida birinchi milliy ilmiy sun'iy yo'ldosh yaratish loyihasi ham muhokama qilindi.

Foto: Prezident matbuot xizmati

Taqdimotda so'nggi 5 yil ichida O'zbekistonda masofadan zondlash ma'lumotlariga bo'lgan talab 3 baravar oshgani, hozirda kosmik monitoring bilan 10 dan ortiq davlat idoralari va barcha hokimiyatlar ishlayotgani ta'kidlandi.

– Eng muhimi, kosmik ma'lumotlar yordamida biz "ko'z bilan ko'rib bo'lmaydigan" iqtisodiy imkoniyatlarni aniqlaymiz va ularni haqiqiy daromad manbaiga aylantiramiz. Bu davlat resurslarini boshqarish mexanizmi va madaniyatining o'zgarishidan dalolat beradi, – dedi prezident.

Shu bilan birga, kosmik sohada uzoq muddatli va barqaror milliy tizim – sun'iy yo'ldoshlarni boshqarish, ma'lumotlarni qayta ishlash va ularni amaliy qo'llash infratuzilmasi shakllantirish muhimligi ta'kidlandi. Buning maqsadi suveren va obyektiv ma'lumot manbaiga ega bo'lishdir.

Xorijiy mamlakatlar tajribasi o'rganilgan va sun'iy yo'ldoshning aniqligi va foydali yuki uchun texnik talablar belgilanganligi qayd etildi.

Taqdimot davomida ilmiy-texnologik salohiyatni oshirish doirasida birinchi milliy ilmiy sun'iy yo'ldosh yaratish loyihasi ham ko'rib chiqildi. Loyiha doirasida mutaxassislar tayyorlash va muhandislik jamoasi shakllantirish, 2028-yilda "Mirzo Ulug'bek" nomli 6U formatidagi ilmiy sun'iy yo'ldoshni uchirish taklif qilindi.

Taqdimot yakunida Shavkat Mirziyoyev sun'iy yo'ldosh loyihalari bo'yicha hisob-kitoblar va amaliy takliflarni puxta ishlab chiqish uchun mas'ul shaxslarga tegishli ko'rsatmalar berdi.

Source: kun.uz