Shovot tumanida sodir bo‘lgan baxtsiz hodisada, Xorazm viloyati OVQ xodimi mast holatda Tracker avtomobilini boshqarib, yo‘l chetida eri bilan yurgan 29 yoshli ayolni urib yuborgan. Shundan so‘ng, yordam ko‘rsatmasdan, haydovchi joyidan qochib ketgan. Ayol tasodifiy mashinada kasalxonaga olib borilgan, ammo vafot etgan.

Sud hujjatlariga ko‘ra, 1984-yilda tug‘ilgan U.A. Xorazm viloyati OVQ Jinoyatchilikni oldini olish boshqarmasining katta inspektori bo‘lib ishlagan. 2025-yil 27-sentabr kuni soat 22:14 atrofida u mast holatda Shovot tumanida Tracker mashinasini boshqarib, yo‘l chetida yurgan 29 yoshli E.R.ni urib yuborgan.

U.A. odamni urganini tushunib, hodisa joyi yaqinida to‘xtagan, lekin yordam ko‘rsatmasdan, qochib ketgan. Ayol og‘ir jarohat olgan va kasalxonada vafot etgan.

Sudda U.A. aybini qisman tan olgan va u joyidan qochmagan, balki pul olish uchun uyiga ketgan, deb da‘vo qilgan. Uning so‘zlariga ko‘ra, u Gentra mashinasidagi odamlarga ayolni kasalxonaga olib borishni topshirgan. Biroq, guvohlar buni rad etgan.

Shovot tuman sudining 2026-yil 23-fevraldagi qarori bilan U.A. Jinoyat kodeksining 266-moddasi 2-qismi (Transport vositalarini harakatlanish yoki foydalanish qoidalarini buzish) va 117-moddasi 2-qismi (Xavfli holatda qoldirish) bo‘yicha aybdor deb topilgan. Unga 3 yil 1 oy ozodlikdan mahrum qilish va 3 yil muddatga transport vositalarini boshqarish huquqidan mahrum etish jazosi belgilangan. Jazoni o‘tash uchun koloniya-poseleniya tayinlangan.

Source: kun.uz