Turkmanistonning Kaspiy dengizi sohilida joylashgan “Avaza” kurort zonasida Markaziy Osiyo davlatlari va Ozarbayjon rahbarlarining sakkizinchi Maslahat uchrashuvi bo‘lib o‘tdi. Ushbu sammit 2025-yil noyabr oyida Ozarbayjon ushbu formatning to‘laqonli ishtirokchisiga aylanganidan buyon o‘tayotgan ilk rasmiy uchrashuv hisoblanadi va mintaqaviy hamkorlikning yangi bosqichini belgilab berdi.

Sammit davomida ishtirokchi davlatlar rahbarlari mintaqaviy xavfsizlik, iqtisodiy integratsiya, transport-logistika yo‘laklari va suv resurslaridan oqilona foydalanish masalalarini muhokama qildilar. Xususan, O‘zbekiston Respublikasi Prezidenti Shavkat Mirziyoyev mintaqada noqulay va murakkab tuzilmalar yaratishdan tiyilish, aksincha, o‘zaro hurmat va sog‘lom pragmatizmga asoslangan moslashuvchan formatni saqlab qolish muhimligini ta’kidladi.

Ozarbayjon Prezidenti Ilhom Aliyev o‘tgan yilda Markaziy Osiyo mamlakatlari bilan tovar ayirboshlash hajmi sezilarli darajada oshganini qayd etib, qo‘shma investitsiya fondlari imkoniyatlaridan yanada faol foydalanishga chaqirdi. Shuningdek, yetakchilar tomonidan savdo-iqtisodiy aloqalarni kengaytirish, xususan, “olti iqtisodiyot — bir mahsulot” formulasini tatbiq etish hamda yagona elektron savdo maydonchasini yaratish takliflari ilgari surildi.

Transport va energetika yo‘nalishlarida Transkaspiy xalqaro transport yo‘lagini rivojlantirish hamda yashil energetika salohiyatini birlashtirish masalalari diqqat markazida bo‘ldi. Tomonlar ekologik muammolar, jumladan, muzliklarning erishi va suv tanqisligi sharoitida amaliy choralar ko‘rish zarurligini e’tirof etib, kelgusidagi hamkorlik yo‘nalishlarini belgilab olishdi.

Source: www.gazeta.uz