Qirg'izistonda 2027-yil 27-yanvarga belgilangan navbatdagi prezidentlik saylovlari uchun rasmiy poyga boshlandi. Mamlakat Markaziy saylov komissiyasiga o'z nomzodini qo'yish bo'yicha ilk rasmiy ariza kelib tushdi, bu haqda mahalliy va xorijiy OAVlar xabar bermoqda.

Ma'lum bo'lishicha, o'z nomzodini o'zi ko'rsatish tartibida 52 yoshli Aymen Kasenov kurashga kirishishga qaror qilgan. U o'zining bo'lajak saylovoldi dasturini «Yer, suv, ishonch» deb nomlagani va u allaqachon tayyor ekanini aytib o'tgan, biroq hozircha ortiqcha tafsilotlarni oshkor qilmaslikni afzal ko'rgan.

Kasenovning tarjimai holiga nazar tashlasak, u Bishkekda tug'ilib, neft-gaz sektori va davlat tuzilmalarida faoliyat yuritgan. Jumladan, u 2007–2015-yillarda «Gazpromneft-Qozog'iston» kompaniyasiga rahbarlik qilgan, so'ngra Bishkek meri maslahatchisi lavozimida ishlagan. Shuningdek, 2016–2018-yillarda Rossiya-Qirg'iziston taraqqiyot jamg'armasi boshqaruvi tarkibiga kirgan.

Eslatib o'tamiz, bu Kasenovning oliy davlat lavozimi uchun ilk urinishi emas. U 2021-yilgi prezidentlik saylovlarida ham qatnashgan edi, biroq o'shanda saylovchilarning atigi 0,91 foiz ovozini to'plagan xolos.

Qirg'izistonda nomzodlarni rasman ko'rsatish jarayoni joriy yilning 25-sentabridan boshlangan bo'lib, 2026-yil 13-noyabriga qadar davom etishi rejalashtirilgan. Bungacha O'murbek Suvanaliyev va Siyimyk Japikeyev kabi siyosatchilar ham saylovda qatnashish niyatida ekanliklarini bildirgan edilar, biroq ularning arizalari hali Markaziy saylov komissiyasiga taqdim etilmagan.

Qonunchilikka ko'ra, nomzodga qo'yiladigan talablar qatoriga uning 35 yoshdan kichik emasligi, davlat tilini mukammal bilishi va Qirg'izistonda jami kamida 15 yil yashagan bo'lishi kiradi. Shuningdek, ishtirok etish uchun kamida 30 ming imzo yig'ish va bir million som miqdorida garov puli kiritish talab etiladi.

Source: podrobno.uz