Germaniyada o‘tkazilgan so‘rov natijalariga ko‘ra, mamlakat aholisining atigi 30 foizi hozirgi koalitsion hukumatning davom etishini qo‘llab-quvvatlaydi. Bu haqda DW xabar berdi.

YouGov instituti tomonidan Welt am Sonntag gazetasi uchun o‘tkazilgan so‘rovda respondentlarning 47 foizi kansler Fridrix Mertsning konservativ bloki va sotsial-demokratlar (SPD) koalitsiyasining tugatilishini xohlaydi. Ulardan 38 foizi yangi saylovlar o‘tkazilishini, 9 foizi esa Mertsning Xristian-demokratik ittifoqi (CDU) va Bavariya Xristian-ijtimoiy ittifoqi (CSU) ozchilik hukumatining saqlanib qolishini ma’qul ko‘radi.

So‘rovda qatnashganlarning 24 foizi aniq javob bermagan. Sharqiy Germaniyada koalitsiyaning tugatilishini xohlovchilar 46 foizni tashkil etgan bo‘lsa, g‘arbiy hududlarda bu ko‘rsatkich 35 foizni tashkil etdi. Sharqda hukumatning davom etishini atigi 22 foiz, g‘arbda esa 31 foiz qo‘llab-quvvatlaydi.

Kansler Mertsning o‘zi ham so‘nggi so‘rovlarda atigi 16 foiz reytingga ega. U juma kuni Vyursburgdagi katoliklar kunida koalitsiya ichidagi nizolar ko‘pligini va yetarli natijalar berilmayotganini tan oldi: “Balki biz hozir juda ko‘p kurashyapmiz va yetarli natijalarni bermayapmiz. Bu mumkin.”

Merts hukumati ijtimoiy ta’minot va mehnat islohotlari, energetika siyosati, shuningdek, Eron urushi tufayli o‘sib borayotgan narxlardan iste’molchilarni himoya qilish kabi masalalarda umumiy til topa olmayapti.

Source: www.dw.com