Braziliyada oktyabr oyida bo‘lib o‘tadigan prezidentlik saylovlari oldidan o‘tkazilgan so‘rovnoma amaldagi prezident Luiz Inasio Lula da Silva va uning o‘ng qanot raqibi Flaviu Bolsonaro o‘rtasidagi keskin raqobatni tasdiqladi.

Datafolha kompaniyasi tomonidan 2004 nafar respondent ishtirokida o‘tkazilgan so‘rovnomaga ko‘ra, ikkala nomzod ham 45 foiz ovoz olgan. 9 foiz saylovchi “bekor” ovoz berishni, 1 foizi esa qaror qilmaganini bildirgan.

80 yoshli Lula to‘rtinchi muddatga saylanishga intilmoqda. U avval 2003-2011 yillarda prezident bo‘lib, kambag‘allarga yordam dasturlarini ilgari surgan.

Flaviu Bolsonaro esa qamoqdagi otasi, sobiq prezident Jair Bolsonaroning siyosiy merosini davom ettirishga umid qilmoqda. U saylangan taqdirda otasining ozod etilishiga va’da bergan.

Biroq so‘rovnoma Bolsonaroning kampaniyasidagi so‘nggi janjal ommaga ma’lum bo‘lishidan oldin o‘tkazilgan. 13 may kuni The Intercept Brasil nashri Bolsonaro va firibgarlikda gumon qilinib hibsga olingan bankir Daniel Vorkaro o‘rtasidagi WhatsApp xabarlarini e’lon qilgan.

Xabarlarga ko‘ra, Bolsonaro Vorkarodan otasi haqidagi “Dark Horse” filmini moliyalashtirishni so‘ragan va u 24 million dollar ajratgan. Flaviu Bolsonaro bu ayblovlarni rad etib, “bu shaxsiy film uchun xususiy homiylik” ekanini ta’kidlagan.

Chap qanot qonunchilar voqeani tergov qilishni talab qilmoqda. Bu Bolsonaroning saylovoldi kampaniyasidagi yagona janjal emas: dekabrda u otasining ozodligi evaziga saylovdan chiqishi mumkinligi haqidagi bayonotlari bilan tanqid qilingan, keyinroq bu fikrni rad etgan.

Aprel oyida Braziliya Oliy sudi federal politsiyaga Flaviu Bolsonaroning Lula haqida tuhmat qilgani bo‘yicha tergov o‘tkazishga ruxsat bergan. 2025 yil oxirida Lula katta farq bilan oldinda bo‘lgan bo‘lsa, hozirda ikkala nomzod tenglashib qolgan.

Source: www.aljazeera.com