Eron hukumati Hormuz bo‘g‘ozidagi suv osti internet infratuzilmasini nazorat qilishni kuchaytirish va bo‘g‘oz tubidan o‘tuvchi aloqa kabellaridan foydalanish uchun to‘lov joriy etishni ko‘rib chiqmoqda. Bu haqda CNN xabar berdi.

Ushbu liniyalar orqali Yevropa, Osiyo va Fors ko‘rfazi davlatlari o‘rtasidagi global internet va moliyaviy trafikning katta qismi o‘tadi. Eron rasmiylari bunday kabellarni litsenziyalash mexanizmini va Google, Microsoft, Meta va Amazon kabi xalqaro texnologik kompaniyalardan yig‘im undirishni muhokama qilmoqda.

Eron Qurolli Kuchlari vakili Ibrohim Zolfagari o‘zining X ijtimoiy tarmog‘idagi sahifasida shunday bayonot bilan chiqdi. Islom inqilobi qo‘riqchilari korpusi bilan bog‘liq OAV ma’lumotlariga ko‘ra, suv osti kabellariga xizmat ko‘rsatish va ta’mirlash faqat Eron kompaniyalariga topshirilishi rejalashtirilgan.

Mutaxassislar Teheran bu tashabbusni to‘liq amalga oshira olishiga shubha qilmoqda. Sababi, AQSh rejimining sanksiyalari G‘arb kompaniyalarining Eron bilan moliyaviy operatsiyalarini cheklaydi. Shunga qaramay, Eron davlat ommaviy axborot vositalari suv osti aloqa liniyalarida uzilishlar yuz berishi mumkinligi haqida ogohlantirgan.

Tahlilchilarning ta’kidlashicha, har qanday uzilish global internet trafigi, bank tizimlari, onlayn xizmatlar, sun’iy intellekt rivojlanishi va hatto harbiy aloqaga ta’sir ko‘rsatishi mumkin. Avvalroq Eron Hormuz bo‘g‘ozining xalqaro kemachilik uchun qayta ochilganini, ammo harakat Teheran shartlari va Eron harbiy-dengiz kuchlari nazorati ostida amalga oshirilishini e’lon qilgan edi.

Source: podrobno.uz