Germaniyada bugungi kunning asosiy yangiliklari qatorida CO2 emissiyasining rejalashtirilganidan yuqori bo‘lishi, fuqaro muhofazasi choralarini kuchaytirish rejalari va kansler Merzning yevroskeptik Bolgariya Bosh vaziri Rumen Radev bilan uchrashuvi bor.
Mustaqil iqlim ekspertlari kengashi Germaniya hukumatinining asosiy iqlim organi xulosalariga qarshi chiqib, mamlakat 2030-yilgi iqlim maqsadlariga erishishda kutilganidan ko‘proq CO2 chiqarishi mumkinligini ma’lum qildi. Kengash CO2 emissiyasining prognozdan 100 million tonnagacha oshib ketishi mumkinligini taxmin qilmoqda. Hukumatning Atrof-muhit agentligi esa atigi 4,5 million tonna oshib ketishni bashorat qilgan edi.
Germaniya 2030-yilga kelib issiqxona gazlari chiqindilarini 1990-yil darajasiga nisbatan kamida 65% kamaytirish va 2045-yilga kelib iqlim neytral bo‘lishni maqsad qilgan. Hozirga qadar qisqarish taxminan 48% ni tashkil etadi. Mart oyida hukumat shamol energetikasini kengaytirish va elektromobillar savdosini oshirish kabi iqlim choralarini moliyalashtirish uchun 8 milliard yevrolik rejani taqdim etgan edi. Biroq kengash raisi Barbara Shlomann, “dasturning haqiqiy qisqartirish samarasi Germaniya hukumati taxmin qilganidan sezilarli darajada past bo‘lishi mumkin”, deb hisoblaydi.
Germaniya Ichki ishlar vaziri Aleksandr Dobrindt hukumat fuqarolarni mojaro yoki falokat holatlarida himoya qilish qobiliyatini kuchaytirish uchun milliardlab yevro sarmoya kiritishni rejalashtirayotganini ma’lum qildi. “Biz aholini muhofaza qilish va fuqaro mudofaasini kuchaytirmoqdamiz”, dedi Dobrindt Bild gazetasiga. Rejalashtirilgan dastur 10 milliard yevroga baholanmoqda va qo‘shimcha jihozlar, binolar, xodimlar va texnologiyalarni o‘z ichiga oladi.
Kansler Fridrix Merz Berlin bo‘ylab safarda bo‘lgan yangi Bolgariya Bosh vaziri Rumen Radevni qabul qiladi. Radev yevroskeptik va rossiyaparast pozitsiyasi bilan tanilgan. Uchrashuvda ikki tomonlama munosabatlar va Yevropa hamda xalqaro xavfsizlik siyosati muhokama qilinadi.
Bundan tashqari, hayvonlar huquqlarini himoya qilish tashkiloti PETA Leyptsig yaqinidagi xususiy muassasadan yo‘lbars qochib, 73 yoshli erkakni og‘ir yaralagandan so‘ng, xavfli yovvoyi hayvonlarni saqlash qoidalarini kuchaytirishni talab qilmoqda. Yo‘lbars politsiya tomonidan otib o‘ldirilgan.
Source: www.dw.com