2023 yilgi Nobel tinchlik mukofoti sovrindori, eronlik huquq himoyachisi Narges Mohammadi kasalxonadan chiqarilib, uyiga qaytdi. Bu haqda uning jamg‘armasi xabar berdi.

54 yoshli Mohammadi yakshanba kuni Tehrondagi Pars kasalxonasidan chiqarilgan. U may oyi boshida qamoqdan kasalxonaga ko‘chirilgan edi, chunki ikki marta hushini yo‘qotgan va og‘ir yurak xurujiga uchragan.

Jamg‘arma bayonotiga ko‘ra, Mohammadi “kelgusi haftalarda shifokor ko‘rigidan o‘tish va kundalik ambulator fizioterapiya bilan shug‘ullanishi rejalashtirilgan”. Shifokorlar uning “doimiy tibbiy kuzatuvda bo‘lishi muhim”ligini ta’kidlamoqda.

Mohammadi dekabr oyida Eronning sharqiy Mashhad shahriga tashrifi chog‘ida hibsga olingan va fevral oyida yetti yildan ortiq qamoq jazosiga hukm qilingan. Uning advokati bu jazoning olti yili “jinoyat sodir etish uchun til biriktirish” moddasi bilan bog‘liqligini aytgan.

Oilasining ta’kidlashicha, uning sog‘lig‘i keskin yomonlashganiga sabab dekabr oyidagi hibs vaqtida kaltaklanganlik bo‘lishi mumkin. Ularning so‘zlariga ko‘ra, bir necha kishi uni butun vujudiga tepgan. Mart oyi oxirida esa u yurak xurujiga uchragan.

Mohammadi qizi va Narges jamg‘armasi hamraisi Kiana Rahmani, Mohammadi qamoqqa qaytarilsa, bu “o‘lim hukmi” bo‘lishini aytdi. “Uning ozod qolishini ta’minlashimiz, barcha asossiz ayblovlarni bekor qilishimiz va ta’qibni to‘xtatishimiz kerak. Inson huquqlari faoliyati jinoyat emas”, dedi Rahmani.

Mohammadi 2023 yilgi Nobel tinchlik mukofotini “Eronda ayollarga qarshi zulmga qarshi kurashi va barcha uchun inson huquqlari hamda erkinlikni targ‘ib qilgani uchun” olgan. Muhandislik bo‘yicha ma’lumotga ega Mohammadi 13 marta hibsga olingan va besh marta sudlangan, umumiy jazosi 30 yildan oshadi.

Source: www.aljazeera.com