Keniyada yoqilg‘i narxining keskin oshishiga qarshi boshlangan umummilliy transport ish tashlashi bir haftaga to‘xtatildi. Bu qaror norozilik namoyishlari chog‘ida to‘rt kishining halok bo‘lishi va 30 dan ortiq odamning yaralanishidan keyin qabul qilindi.
Keniya hukumati yoqilg‘i narxining oshishini AQSh-Isroil rejimining Eronga qarshi urushi bilan bog‘laydi. Eronning amalda Hormuz bo‘g‘ozidagi harakatni to‘sib qo‘yishi natijasida Keniyada benzin narxi 20 foizga, dizel narxi esa deyarli 40 foizga oshgan. Keniya ko‘plab Afrika davlatlari singari Fors ko‘rfazidan yoqilg‘i importiga qaram.
Ish tashlash dushanba kuni transport operatorlari, xususan, Keniyada jamoat transportining asosiy qismini ta’minlovchi “matatu” avtobus operatorlari tomonidan boshlangan edi. Ichki ishlar vaziri Kipchumba Murkomen seshanba kuni jurnalistlarga ish tashlash bir haftaga to‘xtatilganini va hukumat manfaatdor tomonlar bilan muzokaralar olib borishini ma’lum qildi. “Matatu egalari uyushmasi” prezidenti Albert Karakacha ham bu qarorni tasdiqladi.
Rasmiylarning ma’lum qilishicha, dushanba kuni butun mamlakat bo‘ylab to‘rt kishi halok bo‘lgan, 30 dan ortiq kishi yaralangan. Politsiya seshanba kuni yoqilg‘i narxining oshishiga qarshi noroziliklar bilan bog‘liq holda 700 dan ortiq odam hibsga olinganini ma’lum qildi.
Huquq himoyachilari xavfsizlik kuchlari tomonidan o‘ldiruvchi kuch ishlatilishini qoraladi. Amnesty International “maksimal vazminlik”ka chaqirdi. Noroziliklar Keniyaning asosiy savdo yo‘lagini ham izdan chiqardi: mahalliy OAV xabariga ko‘ra, yuk mashinasi haydovchilari yuklarni tashishdan bosh tortgan, chunki ularning transport vositalariga namoyishchilar tomonidan hujum qilinishidan qo‘rqishgan.
Milliy energetika regulyatori o‘tgan hafta hukumat dizel va kerosin narxining oshishidan iste’molchilarni himoya qilish uchun 38,5 million dollar sarflaganini ma’lum qildi. Keniya hukumati o‘tgan oy yana bir favqulodda chora sifatida yoqilg‘i sifat standartlarini vaqtincha bekor qilgan edi. Sharqiy Afrikaning eng dinamik iqtisodiyotlaridan biri bo‘lishiga qaramay, Keniyada chuqur tarkibiy tengsizliklar saqlanib qolmoqda: taxminan 50 million aholining uchdan bir qismi qashshoqlikda yashaydi va ishsizlik yuqoriligicha qolmoqda.
Source: www.aljazeera.com