Gvineya hukumati tomonidan qabul qilingan yangi qarorga ko‘ra, qayta ishlanmagan oltinni eksport qilish taqiqlandi. Ushbu chora mamlakat iqtisodiyotini rivojlantirish va yangi ish o‘rinlarini yaratish maqsadida joriy etilgan.

Prezident Mamadi Doumbouya sanoat va hunarmand oltin ishlab chiqaruvchilari hamda xaridorlari bilan uchrashuvdan so‘ng bu qarorni e’lon qildi. Uning so‘zlariga ko‘ra, boshqa davlatlar xomashyoni qayta ishlash va savdo qilish orqali iqtisodiy foyda ko‘rib kelmoqda.

“Gvineya endi o‘z oltinini o‘z hududida qayta ishlashni talab qiladi. Xom oltin endi Gvineyadan chiqib ketmaydi”, dedi prezident. Ushbu qaror bilan mamlakat qo‘shimcha qiymat yaratish va bandlikni oshirishni maqsad qilgan.

Jahon Oltin Kengashi ma’lumotlariga ko‘ra, Gvineya Afrikadagi oltinchi yirik oltin ishlab chiqaruvchi davlatdir. Mamlakatning asosiy eksport mahsulotlaridan biri bo‘lgan oltin, joriy yilning birinchi choragida 22 tonnadan ortiq miqdorda jo‘natilgan.

Poytaxt Konakrida qurilayotgan yangi qayta ishlash zavodi yiliga 250 tonna oltinni qayta ishlash quvvatiga ega bo‘lib, mamlakatning joriy ishlab chiqarish hajmini to‘liq qamrab olishi kutilmoqda.

Shuningdek, mamlakatda faoliyat yuritayotgan xorijiy kompaniyalarga ushbu ko‘rsatmaga rioya qilmaslik litsenziyalarni yo‘qotish va konchilik shartnomalarini bekor qilish bilan tahdid qilishi haqida ogohlantirilgan.

Gvineya alyuminiy ishlab chiqarishda ishlatiladigan boksitning dunyodagi eng yirik ishlab chiqaruvchisi hamdir.

Source: www.bbc.com