AQSh Davlat departamenti Malayziyaning Vashingtondagi elchisini Isroilga nisbatan uzoq yillik siyosati sababli chaqirtirdi. Bu haqda Malayziyaning Bernama davlat axborot agentligi xabar berdi.
Malayziya tashqi ishlar vaziri Mohamad Hasan payshanba kuni kechqurun elchi Muhammad Shahrul Ikram Yaakob AQSh Davlat departamentiga Malayziyaning Isroil davlatini tan olmaslik siyosati yangi emasligini aytganini ma'lum qildi. "Bu har doim Malayziyaning siyosati bo'lgan. Immigratsiya siyosatimiz Isroil davlati yoki sionistik rejimni tan olmaydi. Bu bizning uzoq yillik pozitsiyamiz", dedi Hasan.
Vazirning so'zlariga ko'ra, ikki fuqarolikka ega bo'lgan bir shaxs AQSh pasporti bilan Malayziyaga kirgan, ammo keyin uning Isroil fuqaroligi ham borligi aniqlangan va undan chiqib ketish so'ralgan. Malayziya Isroil bilan diplomatik aloqalarga ega emas va Falastin tarafini qo'llab-quvvatlab, G'azo va ishg'ol qilingan G'arbiy Sohildagi Isroil harakatlariga qarshi chiqadi.
Vaziyat AQSh investori Balaji Srinivasan tomonidan asos solingan "Network School" raqamli ko'chmanchilar jamoasi atrofida avj oldi. Ijtimoiy tarmoqlarda maktabda isroillik ishtirokchilar borligi da'vo qilinib, tekshiruv boshlandi. Malayziya hukumati barcha ishtirokchilarning hujjatlari to'g'ri ekanini aniqlagan bo'lsa-da, maktab seshanba kuni yopildi.
Sakkiz nafar AQSh kongressmeni Davlat kotibi Marko Rubioga maktub yo'llab, Malayziya Bosh vaziri Anvar Ibrohimning mamlakatdagi isroilliklarni kuzatib, darhol deportatsiya qilish rejasiga norozilik bildirdi. Biroq chorshanba kuni Anvar Malayziya AQSh Kongressi a'zolarining e'tirozlariga qaramay, isroilliklarning kirishini taqiqlashda davom etishini takrorladi.
"Bu bizni to'xtata olmaydi. Ular tahdid qilishi mumkin, ammo men Malayziya xalqining huquqlarini qat'iy himoya qilaman va hukumatning isroilliklarni mamlakatga kiritmaslik qarorini qo'llab-quvvatlayman", dedi Anvar. AQSh kongressmenlari Davlat departamentini Kuala-Lumpur bilan iqtisodiy va xavfsizlik aloqalarini qayta ko'rib chiqishga chaqirdi. Ular, agar 15 kun ichida qaror o'zgartirilmasa, Malayziya harbiy xodimlari uchun AQSh professional ta'limini ta'minlovchi Xalqaro Harbiy Ta'lim va O'qitish dasturiga moliyalashtirishni to'xtatishni talab qilmoqda.
Source: www.aljazeera.com