Jazoirda yo‘lovchi avtobusi jarlikka qulashi oqibatida kamida 27 kishi halok bo‘ldi, yana 39 kishi jarohatlandi. Bu haqda mamlakat sog‘liqni saqlash vaziri ma’lum qildi.

Juma kuni Setif shahridan poytaxt Jazoir shahriga yo‘l olgan avtobus El Karma hududida, manzilga taxminan 50 km qolganda sirg‘anib ketib, chuqur jarlikka qulagan.

Qutqaruv guruhlari voqea joyida ish olib bormoqda, tez yordam mashinalari jarohatlanganlarni yaqin atrofdagi kasalxonalarga yetkazmoqda. Sog‘liqni saqlash vaziri Muhammad Seddik Ait Messaudenning aytishicha, qurbonlar soni yanada oshishi mumkin.

Ennahar TV ma’lumotiga ko‘ra, Bosh vazir Sifi G‘rieb Bumerdes universitet kasalxonasiga yetkazilgan jarohatlanganlarning ba’zilari bilan uchrashgan.

Prezident Abdulmajid Tebun davlat televideniyesi orqali uch kunlik milliy motam e’lon qilgan.

Prezident matbuot xizmati ijtimoiy tarmoqlarda e’lon qilgan bayonotda Tebun avtohalokatda aybdorlarni “yo‘l jinoyatchilari va terrorchilar” deb atadi.

Uning qo‘shimcha qilishicha, voqea yuzasidan tergov yakunlangach, adliya tizimi “temir musht bilan va hech qanday yumshoqliksiz” ish tutadi.

Fuqaro muhofazasi agentligi avtobusning yo‘ldan chiqib ketish sabablari noma’lumligini ma’lum qildi.

Jazoirda yo‘l harakati xavfsizligi organlariga ko‘ra, tezlikni oshirish kabi inson omillari avtohalokatlarning asosiy sababidir. O‘tgan yili yo‘l-transport hodisalarida 3838 kishi halok bo‘lgan, 37 mingdan ortiq kishi jarohatlangan.

Tebun qurbonlar oilalariga ham ta’ziya bildirgan.

Fuqaro muhofazasi xizmati xabariga ko‘ra, uning guruhlari voqea joyiga mahalliy vaqt bilan soat 9:40 da (GMT 08:40) yetib borib, so‘nggi yillardagi eng halokatli avtohalokat qurbonlariga yordam ko‘rsatgan.

O‘tgan avgust oyida Jazoir yaqinida avtobus jarlikka qulab, 18 kishi halok bo‘lgan, 21 kishi jarohatlangan edi. Dekabr oyida esa mamlakat janubidagi Beshar hududida avtobus ag‘darilib, 14 kishi halok bo‘lgandi.

Source: www.aljazeera.com