Italiya politsiyasi bir necha oy oldin o'g'irlangan uchta qimmatbaho rasmni topdi. Ushbu san'at asarlarining umumiy qiymati 10 million dollardan oshadi.

Parma shahri politsiya boshlig'i Andrea Pagliaro AFP agentligiga ma'lum qilishicha, o'g'irlik bilan bog'liq holda to'qqiz nafar moldovalik shaxs tergov qilinmoqda, ulardan besh nafari to'g'ridan-to'g'ri o'g'irlikni amalga oshirgan deb taxmin qilinmoqda.

San'at asarlari shimoliy Parma shahri yaqinidagi Fondazione Magnani Rocca muzeyidan mart oyi oxirida o'g'irlangan edi. O'g'irlik uch daqiqadan kam vaqt ichida sodir etilgan. Italiya milliy politsiyasi (Carabinieri) va uning madaniy merosni himoya qilish bo'limi juma kuni e'lon qilgan bayonotga ko'ra, Pol Sezann, Pyer-Ogüst Renuar va Anri Matissning rasmlari Parmadagi kvartiradan topilgan.

Rasmlar yuz yildan oshiq tarixga ega bo'lib, politsiya bu o'g'irlik ortida uyushgan jinoyatchi guruh turganini taxmin qilmoqda. Juma kuni politsiya tomonidan e'lon qilingan videoda ikki niqobli o'g'ri muzeyga derazadan kirib, rasmlarni devordan olib, tashqarida kutib turgan sherigiga uzatayotgani aks etgan. O'g'irlik paytida signal ishga tushgan.

Shu bilan birga, Braziliya hukumati payshanba kuni kechqurun xuddi shu rassomlardan biri Matissning asarlarini topib olganini ma'lum qildi. Qiymati taxminan 200 ming dollar bo'lgan rasmlar dekabr oyida o'g'irlangan kutubxonaga qaytarilgan. Rasmlar San Bernardo do Kampo shahridagi uy-joydan topilgan va u yerda bir kishi hibsga olingan.

Source: www.aljazeera.com