Pokiston Oliy sudi sobiq bosh vazir Imron Xonni sog‘lig‘i yomonlashgani sababli xususiy kasalxonaga o‘tkazishni buyurdi. Hukumat esa bu qarorga e’tiroz bildirishini ma’lum qildi.

Oliy sud 73 yoshli Xonni Ravalpindidagi Adiala qamoqxonasidan Islomoboddagi Shifa xalqaro kasalxonasiga 48 soat ichida ko‘chirishni talab qildi. Sud qarori, shuningdek, unga shaxsiy shifokori bilan uchrashish huquqini berdi.

Adliya vaziri Azam Nazir Taror o‘z bayonotida bu qaror qonunga to‘g‘ri kelmasligini aytdi. Uning so‘zlariga ko‘ra, mahkumlar qamoqxona ichida yoki davlat kasalxonasida davolanishi kerak, shuning uchun u Xonning tekshiruvlarini xususiy emas, balki davlat shifoxonasida o‘tkazishni so‘radi.

Imron Xon 2023-yildan beri qamoqda. U bir qator ayblovlar bo‘yicha hukm qilingan, biroq ularni siyosiy sabablarga bog‘lagan. Uning partiyasi Pokiston Tehrik-e-Insaf (PTI) va oilasi uning sog‘lig‘i yomonlashayotgani haqida qayta-qayta xavotir bildirgan.

Xonning advokatlari uning o‘ng ko‘zida ko‘rish qobiliyatini deyarli yo‘qotganini aytishgan. Sud qarori unga haftada bir marta oilasi bilan uchrashish va Londonda yashaydigan o‘g‘illari bilan haftada ikki marta telefon qilish imkonini beradi.

Xon 2018-2022 yillarda Pokiston bosh vaziri bo‘lgan. Ishonchsizlik votumi bilan hokimiyatdan ketganidan so‘ng, u noqonuniy nikoh va korrupsiya kabi ayblovlar bilan hukm qilingan. O‘tgan yil oxirida u rafiqasi bilan birga 17 yilga qamalgan.

PTI hali ham mamlakatning asosiy viloyatlarida katta qo‘llab-quvvatlanmoqda. Xonning hibsga olinishi 2023-yil boshida butun mamlakat bo‘ylab norozilik namoyishlariga sabab bo‘lgan, yuzlab odamlar hibsga olingan.

Source: www.dw.com