Birlashgan Arab Amirliklari (BAA) prezidenti Shayx Muhammad bin Zayd Ol Nahayon (MBZ) misrlik faol va shoir Abdul Rahmon al-Qaradoviyga avf berdi. Bu haqda davlat matbuoti xabar berdi. Al-Qaradoviy 2024-yil dekabr oyida Livanda hibsga olingan va 2025-yil yanvarida BAAga ekstraditsiya qilingan edi.

U BAAda “jamoat xavfsizligini buzishga qaratilgan faoliyatda ishtirok etish”da ayblangan. Abu-Dabi Federal Apellyatsiya sudining kiberjinoyat bo‘limi 27-avgust kuni uni 10 yilga qamoq jazosiga hukm qilgan va 200 ming dirham (taxminan 55 ming dollar) miqdorida jarima solgan edi.

Davlat axborot agentligi WAM juma kuni prezidentning avf haqidagi farmoni chiqqanini va “prezident avfini amalga oshirish uchun zarur choralar ko‘rilganini” ma’lum qildi. Al-Qaradoviyning ozodlikka chiqarilgani hozircha noma’lum.

Al-Qaradoviy sunniy dunyosining eng nufuzli diniy olimlaridan biri Yusuf al-Qaradoviyning o‘g‘li. U 2011-yilgi “Arab bahori” qo‘zg‘olonlarini qo‘llab-quvvatlagan va Misr hamda ba’zi ko‘rfaz davlatlari rahbarlarining noroziligiga sabab bo‘lgan edi.

Al-Qaradoviyning oilasi 2025-yil yanvarida Livanni ogohlantirib, agar uni talab qilgan davlatga ekstraditsiya qilinsa, uning hayoti xavf ostida qolishini aytgan edi. Huquq himoyachilari va BMT ekspertlari esa uning ozod etilishini talab qilib, u faqat so‘z erkinligidan foydalangani uchun hibsga olinganini ta’kidlagan edi.

Source: www.aljazeera.com