AQShning Pensilvaniya shtatidan senator Jon Fetterman, demokrat bo‘lishiga qaramay, o‘z partiyasidan uzoqlashib borayotgani ma’lum bo‘ldi. U Respublikachilar partiyasining AQShda bo‘lib o‘tgan ikki kunlik midterm qurultoyining birinchi kunida video orqali chiqish qildi.
Texasning Dallas shahrida bo‘lib o‘tgan konservativ yig‘inda Prezident Donald Tramp noyabr saylovlari oldidan o‘z tarafdorlarini birlashtirishga harakat qilmoqda. Fettermanning video chiqishi yig‘ilganlar uchun kutilmagan voqea bo‘ldi. U o‘zini «sog‘lom fikrli demokrat» deb tanishtirib, respublikachi hamkasbi senator Deyv MakKormikni taqdim etdi.
57 yoshli birinchi muddat senator Fetterman o‘zini Demokratik partiya ichida autsayder sifatida ko‘rsatib kelmoqda. U Isroilni ochiq qo‘llab-quvvatlashi va Eron bilan urushni yoqlashi bilan partiyasidagi progressiv qanotning tanqidiga uchragan. «Men har doim Amerika tarafida bo‘laman. Men ekstremizm, sotsializm va bu antiamerika turmush tarzini rad etaman», — degan u video lavhada.
Biroq uning Respublikachilar partiyasining ilk midterm qurultoyida qatnashishi demokrat hamkasblarining tanqidini yanada kuchaytirishi mumkin. Pensilvaniyadan bo‘lgan demokrat kongressmen Brendan Boyl Fettermanning partiyaviy sadoqatini va davlat xizmatiga sodiqligini bir necha bor shubha ostiga olgan. Chorshanba kungi videodan so‘ng u yana o‘z fikrini bildirdi: «Bir yil avval men Jon Fetternanni “Trampning sevimli demokrati” deb atagandim. Bugun u nima uchun ekanini yana bir bor isbotladi».
Fetterman o‘z vazifalariga befarqligi haqidagi xabarlardan keyin ham savollarga duch kelmoqda. The Wall Street Journal nashrining yaqinda chop etilgan maqolasida senator saylovchilar bilan uchrashuvlarni bekor qilgani aniqlangan. Jumladan, iyun oyida jarohatlangan harbiy faxriylar bilan uchrashuvni kasallik bahonasida o‘tkazib yuborib, keyinroq Isroil va AQShning Eronga qarshi urushi haqida Fox News telekanaliga intervyu bergani ma’lum qilingan.
Uning reytingi Pensilvaniyada respublikachilar orasida o‘z partiyasi a’zolariga qaraganda yuqoriroq. O‘tgan oy The New York Times, Siena kolleji va The Philadelphia Inquirer tomonidan o‘tkazilgan so‘rov natijalariga ko‘ra, Pensilvaniya respublikachilarining 73 foizi Fetterman faoliyatini ma’qullagan, 2024 yilda bu ko‘rsatkich 25 foiz edi. Shu bilan birga, shtatdagi demokratlarning qo‘llab-quvvatlashi so‘nggi ikki yilda 74 foizdan 22 foizga tushib ketgan. Demokrat respondentlarning 63 foizi unga salbiy munosabatda.
Fetterman o‘zini Demokratik partiya ichida mustaqil shaxs sifatida tasvirlasa-da, partiyasini o‘zgartirib respublikachi bo‘lishini rad etgan. «Men respublikachi bo‘lmayman, lekin men kim bilan bo‘lsa ham to‘g‘ri gaplashadigan demokrat bo‘laman», — degan u Fox News’ga bergan intervyusida. Shunga qaramay, midterm saylovlar yaqinlashar ekan, uning partiyaviy mansubligi haqidagi mish-mishlar davom etmoqda.
3 noyabrda bo‘lib o‘tadigan saylovlar Trampning vakolat muddatining so‘nggi ikki yilida Kongressni qaysi partiya nazorat qilishini hal qiladi. Respublikachilar hozirda Vakillar palatasi va Senatda kichik ko‘pchilikka ega, biroq saylovchilarning turmush qimmatligidan noroziligi va Trampning tobora ommalashmayotganligi tufayli saylovlarda mag‘lubiyatga uchrashlari mumkin. Senatni qaytarib olish demokratlar uchun ayniqsa qiyin bo‘lishi mumkin, chunki bu yil Senatdagi o‘rinlarning faqat uchdan bir qismi qayta saylanadi, Vakillar palatasining barcha 435 o‘rni esa saylanadi. Fetterman esa faqat 2028 yilda qayta saylovga chiqadi.
Source: www.aljazeera.com