G'azo shahridagi Tal al-Havo hududida olti qavatli turar-joy binosi qulashi oqibatida kamida 20 kishi, jumladan ayollar va bolalar halok bo'ldi. Falastin anklavidagi rasmiylarning ma'lum qilishicha, yana o'nlab kishilar vayronalar ostida qolib ketgan.

Fuqarolik mudofaasi xizmati ma'lumotlariga ko'ra, har bir qavatda to'rtta xonadon bo'lgan bino chorshanba kuni qo'shni uylar va chodirlar ustiga qulab tushgan. Agentlik vakili Mahmud Basal Al-Jazira telekanaliga bergan intervyusida: "Fuqarolik mudofaasi guruhlari hanuz vayronalar ostidan shahidlarni olib chiqish va bedarak yo'qolganlarni qidirish ishlarini davom ettirmoqda. Hozirga qadar ushbu bino vayronalari ostida 100 ga yaqin falastinlik qolgan", — dedi.

Mahalliy ommaviy axborot vositalarining xabar berishicha, bino avvalroq Isroil zarbalariga uchragan va qulashdan oldin yorilib, konstruktiv jihatdan mustahkam bo'lmagan. Isroilning G'azoga qarshi urushi qamal qilingan hudud bo'ylab minglab binolarni vayron qilgan yoki shikastlagan, Isroil esa ta'mirlash uchun zarur bo'lgan qurilish materiallarini kirishini qattiq cheklab qo'ygan.

Ko'plab falastinliklar uysiz qolgan va qurilish materiallari keskin tanqis bo'lgan sharoitda, ko'chirilgan oilalar Isroil bombardimonidan zarar ko'rgan uylariga qaytishga majbur bo'lmoqda. Bu esa yana qurbonlar sonining ortishiga olib kelmoqda.

Source: www.aljazeera.com