Janubiy Koreya Ukraina tomonidan Shimoliy Koreya harbiy asirlarini topshirish bo‘yicha maxfiylik kelishuvi buzilgani va keyinchalik kelishuv mavjudligi inkor etilgani uchun rasmiy uzr so‘rashni talab qildi. Seul ma’lumotlariga ko‘ra, Kiyev ikki shimoliy koreyalik asirni topshirish bo‘yicha kelishuvga erishgan, ammo bu maxfiy bo‘lishi shart edi.
O‘tgan hafta Ukraina prezidenti Vladimir Zelenskiy Nyu-Yorkda Birlashgan Millatlar Tashkiloti Bosh Assambleyasida nutq so‘zlab, asirlar topshirilganini e’lon qildi va ularni “tirik qo‘lga olish oson bo‘lmagan” deb ta’kidladi. Bir necha soat o‘tgach, Janubiy Koreya prezidenti Li Chje Myon ijtimoiy tarmoqlarda: “Ukraina tomoni nima uchun kelishuvni buzib, bu masalani oshkor qilganini bilmayman, ammo bu juda xafa qiladi”, deb yozdi.
Yakshanba kuni Janubiy Koreya prezidenti ma’muriyatining jamoatchilik bilan aloqalar bo‘yicha katta kotibi Son Gi Xon “rasmiy tushuntirish va uzr so‘rash”ni talab qildi. Uning so‘zlariga ko‘ra, “Prezident idorasi Ukrainaning bir tomonlama oshkor qilishi va keyin maxfiylik kelishuvi bo‘lmaganligi haqidagi yolg‘on bayonotidan qattiq afsusda”. Son Gi Xon bu “ikki hukumat o‘rtasidagi ishonchni jiddiy ravishda zaiflashtiradigan va ikki davlat o‘rtasidagi do‘stona munosabatlarga katta zarar yetkazadigan juda jiddiy masala” ekanligini qo‘shimcha qildi. U Seul “bu masala yuzasidan zarur bo‘lishi mumkin bo‘lgan qo‘shimcha choralarni ko‘rib chiqmoqda”, degan, ammo aniq choralarni aytmagan.
Shimoliy Koreya askarlari 2025-yil yanvar oyida Rossiyaning Kursk viloyatida Ukraina kuchlari tomonidan asirga olingan. Ular hududga Ukraina kutilmagan hujumini to‘xtatish uchun yuborilgan 14 mingga yaqin shimoliy koreyalik harbiylardan ikkitasidir. Ukraina razvedkasi ma’lumotlariga ko‘ra, 3 mingga yaqin shimoliy koreyalik askar halok bo‘lgan, yana 1500 nafari yaralangan, qolganlari Rossiya hududida qolmoqda. Hozirga qadar Shimoliy Koreya askarlari Ukraina hududida harakat qilgani haqida ma’lumot yo‘q. Ukraina harbiylari qurshovda qolgan yoki yaralangan shimoliy koreyalik askarlar taslim bo‘lishdan ko‘ra o‘z joniga qasd qilishni afzal ko‘rishganini, faqat ikkitasi asirga olinganini xabar qilgan.
Prezident Li boshchiligida Shimoliy Koreya bilan munosabatlarni yaxshilashga urinayotgan Janubiy Koreya bu ikki asirni o‘z qo‘liga olishga ikkilangan ko‘rinadi. Biroq Janubiy Koreya konstitutsiyasining 3-moddasiga ko‘ra, shimoliy koreyaliklar hali ham Janubiy Koreya fuqarolari hisoblanadi va Janubda yashash huquqiga ega. Janubiy Koreya Ukrainaning ittifoqchisi bo‘lsa-da, hozirgacha faqat halokatli bo‘lmagan yordam ko‘rsatgan. Kiyev esa Seuldan ilg‘or havo mudofaa tizimlarini yetkazib berishni talab qilmoqda. O‘tgan oy Zelenskiy Rossiyaga yana 50 minggacha shimoliy koreyalik askar joylashtirilishi mumkinligini da’vo qilgan edi.
Source: www.dw.com