Pokiston Prezidenti Asif Ali Zardariy yakshanba kuni mamlakat shimoli-g'arbiy qismidagi Xayber-Paxtunxva viloyatida favqulodda holat joriy etish haqidagi farmonni imzoladi. Mazkur hudud sobiq bosh vazir Imron Xonning tarafdorlari asosiy tayanchi bo'lib, u yerda aynan uning «Pokiston Tehrik-e-Insaf» (PTI) partiyasi hokimiyat yuritib kelayotgan edi. Ushbu qadam mintaqaviy ma'muriyat vakolatlarini amalda to'xtatib qo'ydi va markaziy hokimiyatga keng huquqlar berdi.

Favqulodda holat rejimi amaldagi Bosh vazir Shahboz Sharifning tashabbusi bilan kiritilgan bo'lib, rasmiylar bu qarorni hududdagi xavfsizlik tahdidlari va terrorizmga qarshi kurash zarurati bilan izohlamoqdilar. Sharif ma'muriyati da'vo qilishicha, mintaqaviy hokimiyat viloyatda kuchayib borayotgan islomiy zo'ravonliklar va xavfsizlik muammolariga qarshi yetarlicha chora ko'rmayapti. Shu bilan birga, muxolifat vakillari bu harakatni siyosiy tazyiq va muxolif partiyani hokimiyatdan chetlashtirish yo'lidagi navbatdagi qadam sifatida baholamoqda.

2023-yildan buyon qamoqda saqlanayotgan sobiq bosh vazir Imron Xon o'z ta'sirini saqlab qolgan bo'lib, uning tarafdorlari 2024-yilgi saylovlar soxtalashtirilganini da'vo qilib, ommaviy norozilik namoyishlarini davom ettirmoqdalar. Minglab faollar sobiq yetakchini ozod qilishni talab qilib, Shahboz Sharif ma'muriyatining siyosatiga qarshi chiqmoqda. O'z navbatida, rasmiylar PTI partiyasini mamlakatda xurujlar uyushtirayotgan terrorchilik guruhlariga xayrixohlikda ayblamoqda, biroq muxolifat bu ayblovlarning barchasini keskin rad etib, siyosiy qoralash kampaniyasi deb atamoqda.

Source: www.dw.com