️ Angliya Premyer-ligasida ishtirok etuvchi Londonning “Fulhem” klubi bosh murabbiyi Alvaro Arbeloa Angliya futbol assotsiatsiyasi (FA) tomonidan 33 ming dollardan ortiq miqdorda jarimaga tortildi hamda unga rasmiy ogohlantirish berildi. Bunga ispaniyalik mutaxassisning sentabr oyida “Manchester Yunayted”ga qarshi o‘tkazilgan bahsdan keyingi bahsli bayonotlari sabab bo‘ldi.

️ 20-sentabr kuni “Kreyven Kottedj” stadionida bo‘lib o‘tgan uchrashuvda mezbonlar g‘alabani qo‘ldan chiqarishgan edi. O‘yinning 89-daqiqasida Mateus Kunyaning rikoshet orqali kiritgan goli evaziga “Manchester Yunayted” 1:1 hisobidagi durangni saqlab qolgan. Mazkur durang natijadan so‘ng matbuot anjumanida qatnashgan Arbeloa uchrashuv hakamlari “Yunayted”ning mag‘lubiyatiga yo‘l qo‘ymaslikka harakat qilayotganini shama qilgan edi.

️ Arbeloa o‘z intervyusida: “Manchester Siti”ga qarshi bahsdan keyinoq ular bu yerda “Manchester Yunayted”ning yutqazishiga yo‘l qo‘ymasliklarini bilardim”, deb ta’kidlagan edi. Murabbiy bu bilan “Old Trafford”da 10 kishi qolgan “Siti”ning 1:0 hisobidagi g‘alabasini, jumladan, Erling Holandning uzoq davom etgan VAR tekshiruvidan so‘ng hisoblangan bahsli golini nazarda tutgan edi.

️ Angliya futbol assotsiatsiyasi e’lon qilgan bayonotda qayd etilishicha, “Fulhem” bosh murabbiyi o‘yindan keyingi intervyusida hakamlarning xolisligiga shubha bildirib, ularning halolligini so‘roq ostiga olgan va nomaqbul xatti-harakat sodir etgan. Qayd etilishicha, 43 yoshli ispaniyalik murabbiy o‘ziga qo‘yilgan ayblovni to‘liq tan olgan.

️ Iyul oyida London jamoasi boshqaruviga kelgan Arbeloa hozircha APL doirasida o‘zining ilk g‘alabasini qo‘lga kirita olgani yo‘q. Hozirda “Fulhem” oltita uchrashuvdan so‘ng bor-yo‘g‘i 2 ochko jamg‘argan holda turnir jadvalining eng quyi pog‘onasida bormoqda.

Source: www.aljazeera.com