Rim papasi Leo XIV yaqinda o'tkazilgan jarrohlik amaliyotidan so'ng kasallik tarqalmagani tasdiqlangani sababli o'pka saratoni bo'yicha hech qanday qo'shimcha davolanishga muhtoj emasligi ma'lum qilindi. Vatikan shifokorlari tarqatgan bayonotda shu haqda so'z boradi.

Bosh jarroh Stefano Margaritora va shaxsiy shifokor Luigi Carbone chorshanba kuni e'lon qilgan bayonotida, navbatdagi onkologik tekshiruvlar natijasida qo'shimcha terapiya talab etilmasligi tasdiqlanganini ta'kidladilar.

Yetmish bir yoshli pontifik 13-oktabr kuni o'ng o'pasining quyi bo'lagini oldirib tashlash bo'yicha operatsiyani boshdan kechirgan edi. Unga o'pka adenokarsinomasi tashxisi qo'yilgan bo'lib, u kasallikning eng keng tarqalgan shakli hisoblanadi. Leo shanba kuni Rimdagi Gemelli poliklinikasidan uyiga javob berilgan va Vatikan uning faoliyati bosqichma-bosqich tiklanishini ma'lum qilgandi. Chorshanba kuni esa u Avliyo Pyotr maydoniga qaytib, ziyoratchilar bilan an'anaviy haftalik uchrashuvini o'tkazdi.

Odatda kasallik limfa tugunlari orqali tarqalgani aniqlansa yoki uning tajovuzkor shaklda ekanligidan darak beruvchi belgilar bo'lsa, qo'shimcha muolajalar tavsiya etiladi. Biroq o'sma juda erta bosqichda aniqlanganda jarrohlik amaliyotining o'zi kifoya qilishi mumkin. Katoliklar yetakchisida ham aynan shunday holat kuzatilgan bo'lib, o'sma tuguni boshqa sababga ko'ra o'tkazilgan tekshiruv paytida tasodifan topilgan edi.

Shifokorlarning so'zlariga ko'ra, pontifik hatto kasalxonada yotgan paytida ham o'z vazifalarini bajarishda davom etgan va Rossiya rahbariyati bilan muloqot qilgani aytilmoqda. U operatsiyadan keyingi jamoat oldidagi chiqishlarida tetik ko'ringan va 6–17-noyabr kunlari Urugvay, Argentina hamda Peru davlatlariga rejalashtirilgan safarini amalga oshirishi kutilmoqda.

Source: www.aljazeera.com