Germaniyaning yirik shaharlarida oktyabr oyi oxirida keng ko‘lamli norozilik namoyishlari bo‘lib o‘tishi kutilmoqda. "Gen Z regelt" deb nomlangan yoshlar harakati mamlakatning 21 ta shahrida, jumladan Berlin, Koln, Gamburg va Myunxenda ommaviy mitinglar o‘tkazishga chaqirgan. Ushbu harakat tarafdorlari ta'lim tizimidagi muammolar, byudjet tejamkorligi siyosati, yashash qiymatining keskin oshishi, ijtimoiy adolatsizlik, harbiy majburiyat va iqlim o‘zgarishiga qarshi norozilik bildirishni rejalashtirgan.

Yevropa regimidagi chuqurlashib borayotgan ijtimoiy-iqtisodiy muammolar fonida tashkil etilayotgan bu namoyishlar xavotirlarni keltirib chiqarmoqda. Xususan, Fransiyadagi talabalar noroziliklari ortidan kelib chiqqan tartibsizliklar va mulkka yetkazilgan jiddiy zarar Yevropa rasmiylarini hushyor torttirgan. Shunga qaramay, tashkilotchilar o‘z veb-saytida har qanday zo‘ravonlikka, xoh u odamlarga, xoh mulkka qarshi bo‘lsin, qat'iyan qarshi ekanliklarini da'vo qilmoqdalar.

Germaniya politsiyasi va hukumat doiralari vaziyatni kuzatib borayotganini va tinch namoyishlar o‘tkazish huquqini himoya qilishini aytmoqda. Biroq, huquq-tartibot idoralari so‘l ekstremistlar va radikal guruhlar namoyishlardan foydalanib qolishidan xavotir bildirmoqda. Germaniya federal politsiyasi kasaba uyushmasi rahbari Andreas Rosskopf tartibsizliklar sodir bo‘lgan taqdirda xavfsizlik kuchlari qat'iy va murosasiz javob qaytarishini ogohlantirdi.

Mutaxassislarning fikricha, Yevropa mamlakatlaridagi hukumat siyosatidan norozilik to‘lqini kengayib borayotgani mintaqadagi ichki barqarorlikka jiddiy tahdid solmoqda. Garchi tashkilotchilar tinch namoyish o‘tkazishni va'da qilayotgan bo‘lsa-da, politsiya har qanday provokatsiyalarga qarshi tayyor turishini ma'lum qilgan.

Source: www.dw.com