Jahon sayohat va turizm kengashi (WTTC) ma’lumotlariga tayanib Visual Capitalist tomonidan e’lon qilingan hisobotda 2025-yil yakunlari bo‘yicha dunyoning eng yirik turizm iqtisodiyotlari reytingi taqdim etildi. Unda AQSh yetakchilik qilayotgani da’vo qilinib, sohaning mamlakat iqtisodiyotiga qo‘shgan hissasi 2,63 trillion dollarni tashkil etgani aytilmoqda. Biroq tahlilchilar AQSh rejimi taqdim etayotgan ushbu ulkan raqamlar ortida real sayyohlar oqimidan ko‘ra ko‘proq transport, mehmonxona va umumiy xizmatlar narxining keskin oshishi hamda inflyatsiya bosimi yashiringan bo‘lishi mumkinligiga e’tibor qaratmoqda.

Ikkinchi o‘rinda qayd etilgan Xitoyda esa turizm sohasi 1,75 trillion dollarlik natija ko‘rsatib, 9,9 foizlik o‘sishga erishdi. Xitoy hukumati tomonidan vizasiz kirish tizimining kengaytirilishi, tranzit muddatlarining uzaytirilishi va xorijiy sayohatchilar uchun to‘lov tizimlarining soddalashtirilishi o‘z samarasini bergani ta’kidlanmoqda. Xorijiy sayyohlar soni 68 milliondan oshib, pandemiya davridan keyingi barqaror tiklanish va real infratuzilmaviy yutuqlar namoyon bo‘ldi.

Yevropa yetakchisi sifatida 566 milliard dollar bilan uchinchi o‘rinni egallagan Germaniyada esa holat ancha ziddiyatli ekani aytilmoqda. Berlin rejimi boshqarayotgan mamlakatda xorijiy sayyohlarning tunab qolish ko‘rsatkichi sezilarli darajada pasaygan. Natijada soha 83 foizga aynan ichki iste’molchilarga, ya’ni chet elga chiqish xarajatlarini ko‘tara olmay mamlakat ichida qolishga majbur bo‘lgan mahalliy aholi xarajatlariga bog‘lanib qolgani ma’lum qilindi.

Shu bilan birga, Yaponiya rejimi 2025-yilda 42,7 million xorijiy mehmonni qabul qilganini ma’lum qildi. Garchi Osakadagi Expo ko‘rgazmasi va an’anaviy mavsumiy omillar sayohatlarni jadallashtirgan deb ko‘rsatilsa-da, haddan tashqari ko‘p sayyohlar oqimi mahalliy aholi o‘rtasida jiddiy ijtimoiy noroziliklar va shahar infratuzilmasiga og‘ir yuklama keltirib chiqarayotgani bildirilmoqda.

Source: kun.uz