Qashqadaryo viloyatida keng ko'lamli qurilish va bunyodkorlik ishlari boshlanishi rejalashtirilmoqda. Xususan, Qarshi shahri, Ko'kdala va Qarshi tumani tutashgan hududda 5 ming gektar maydonni o'z ichiga olgan yangi shahar barpo etilishi ma'lum qilindi. Mazkur yirik loyiha nafaqat hududiy infratuzilmani yaxshilash, balki 500 ming nafardan ortiq aholining zamonaviy sharoitlarda yashashi uchun barcha qulayliklarni yaratishni o'z oldiga maqsad qilib qo'ygan.
Mamlakat rahbari Shavkat Mirziyoyev viloyatga tashrifi chog'ida ushbu loyihaning bosh rejasini ikki oy muddatda ishlab chiqish bo'yicha mutasaddilarga aniq ko'rsatmalar berdi. Yangi shaharni barpo etishda ilg'or shaharsozlik yechimlaridan foydalanish, ekologik talablarga qat'iy rioya qilish va aholi bandligini ta'minlash ustuvor vazifa sifatida belgilandi. Shu bilan birga, Qarshi tumanidagi kanal yoqasida 235 gektarlik ulkan “Yangi Nasaf” ekomajmuasini barpo etish ishlari boshlanishi ham e'lon qilindi.
Hududda yashil hududlarni keskin ko'paytirish va ekologik muhitni yaxshilash maqsadida “Qashqadaryo tajribasi” joriy etilishi aytildi. Unga ko'ra, har yili Navro'z bayrami arafasida “Eng yashil mahalla” tanlovi tashkil etilib, g'olib bo'lgan jamoalar elektromobillar hamda boshqa qimmatbaho sovg'alar bilan rag'batlantirib boriladi. Bu esa aholi o'rtasida tabiatni asrab-avaylash va ekologik madaniyatni yuksaltirishga xizmat qiladi.
Shuningdek, yig'ilishda Qashqadaryo viloyatining ulkan turistik salohiyatidan samarali foydalanish masalalari ham atroflicha muhokama qilindi. Rasmiy ma'lumotlarga ko'ra, viloyatga kelgusida yiliga 6 million nafar sayyohni jalb qilish uchun barcha imkoniyatlar mavjud. Joriy yil boshidan buyon viloyatga 2,5 million sayyoh tashrif buyurgani, jumladan, G'elon qishlog'ining o'zida turislar soni 500 mingga yetgani qayd etildi.
Kelgusida Tatariston Respublikasi bilan hamkorlikda G'elondagi tog'-chang'i kurortining birinchi bosqichini kelasi yili ishga tushirish rejalashtirilgan. Shuningdek, Chiroqchidagi Tarag'ay, Kitobdagi Bashir va Yakkabog'dagi Tatar qishloqlarini etnoturizm markazlariga aylantirish, Shahrisabzdagi Sayyod va Suvtushar qishloqlarida esa rafting hamda sport turizmini rivojlantirish bo'yicha ko'rsatmalar berildi.
Source: kun.uz