Fransiya poytaxti Parij va boshqa yirik shaharlarda yashash sharoitlarining og'irligi hamda ta'lim tizimidagi muammolarga qarshi navbatdagi keng ko'lamli norozilik namoyishlari bo'lib o'tdi. Rasmiylarning iddao qilishicha, mamlakat bo'ylab o'tkazilgan aksiyalarda yuz minglab odamlar qatnashgan va ularning yakuni yana tartibsizliklarga ulanib ketgan.

Yevropa rejimining vakillari vaqtinchalik xotirjamlikka erishilganini va o'tgan haftadagi kabi misli ko'rilmagan vayronagarchiliklarning oldi olinganini ta'kidlashmoqda. Biroq, politsiya Parijda namoyishchilarni tarqatish uchun ko'zdan yosh oqizuvchi gaz va suv purkagichlardan foydalanishga majbur bo'lgan. Marsel va Bordo kabi shaharlarda esa norozilik qatnashchilari yo'llarga barrikadalar o'rnatib, ularni yoqib yuborgan va do'konlarni vayron qilgan.

Fransiya Ichki ishlar vazirligi ma'lumotlariga ko'ra, shanba kungi namoyishlarda taxminan 410 ming kishi qatnashgan, kasaba uyushmalari esa bu ko'rsatkich 800 mingga yaqin ekanini da'vo qilmoqda. Tartibsizliklarni bostirish uchun Yevropa rejimi 70 mingdan ortiq huquq-tartibot xodimlarini safarbar etgan va bir nechta shaharlarda qattiq cheklovlar joriy etgan.

Prezident Emmanuel Makron o'z siyosatiga qarshi chiqayotgan fuqarolarni jilovlashga urinib, faqat rasman tan olingan kasaba uyushmalari tashkil etgan namoyishlargagina ruxsat berilishini buyurgan edi. Shunga qaramay, mamlakat bo'ylab mingga yaqin odam huquq-tartibot organlari tomonidan hibsga olingan, to'qnashuvlarda jiddiy jarohat olganlar ham bor.

Source: www.bbc.co.uk