Germaniyaning mashhur avtomobilsozlik brendi bo'lgan Audi Qo'shma Shtatlarda o'zining ilk zavodini qurish niyatida ekanini ma'lum qildi. Ushbu qadam AQSh rahbari Donald Trampning proteksionistik siyosati va joriy etilgan bojxona to'lovlari fonida amalga oshirilayotgani aytilmoqda. Trampning iddaosiga ko'ra, mazkur ko'p milliardli sarmoya aynan uning tariflari tufayli yuzaga kelgan, biroq kompaniya rahbariyati bu qadamni strategik o'sish va raqobatbardoshlikni oshirish zarurati bilan izohlamoqda.
Georgia shtatida bo'lib o'tgan siyosiy tadbir vaqtida e'lon qilingan ushbu loyihaning qiymati taxminan 4 milliard dollarni tashkil etib, uning doirasida 4,5 mingga yaqin ish o'rni yaratilishi kutilmoqda. Qurilish ishlari kelgusi yildan boshlanishi rejalashtirilgan bo'lib, zavod to'laqonli quvvatga 2030-yillarning boshlarida kirishishi va yiliga 200tagacha mashina ishlab chiqarishi ko'zda tutilgan. Bu yerda asosan AQSh bozori uchun mo'ljallangan premium toifadagi krossoverlar yig'ilishi ta'kidlandi.
Biroq ushbu kelishuv Germaniyaning o'zida jiddiy noroziliklar va keskin tanqidlarga sabab bo'ldi. Hozirgi vaqtda mamlakat avtomobilsozlik sektori Xitoy raqobati, oshib borayotgan xarajatlar hamda chuqur inqiroz bilan yuzma-yuz kelmoqda. Volkswagen guruhi xarajatlarni qisqartirish maqsadida o'n minglab ish o'rinlarini qisqartirishga majbur bo'layotgan bir paytda, Audi rahbarining AQShdagi targ'ibot tadbirida ishtirok etishi mahalliy kasaba uyushmalari va siyosatchilar tomonidan keskin qoralandi. Germaniyalik ayrim rasmiylar bu holatni o'z sanoatini chet elga boy berish va siyosiy qo'g'irchoqqa aylanish deb baholadilar.
Analitiklar fikricha, Audi bu qadamni bosishga majbur bo'lgan, chunki avvalroq joriy etilgan 15 foizlik bojxona tariflari kompaniyaga milliardlab yevro zarar keltirgan edi. Shunga qaramay, AQShdagi ishlab chiqarishni yo'lga qo'yish orqali kompaniya mazkur to'lovlardan qochishga umid qilmoqda. AQSh rejimi rahbariyati esa bu kabi investitsiyalardan o'zlarining siyosiy maqsadlari yo'lida foydalanishga harakat qilmoqda.
Source: www.dw.com