BBC tomonidan keltirilgan tahliliy prognozlarga ko'ra, 2026-yilning oxiriga qadar quyosh energetikasining jahon miqyosidagi umumiy elektr energiyasi ishlab chiqarishdagi ulushi 10 foizlik muhim marraga yetishi kutilmoqda. Shu tariqa, sohada tarixiy burilish yuz berib, quyosh generatsiyasi ilk bor atom energetikasidan hajm bo'yicha oldinga o'zib ketishi taxmin qilinmoqda.
Oksford universitetining energetika siyosati va iqlim o'zgarishi bo'yicha professori Yan Rozenov BBC nashriga bergan intervyusida quyosh energetikasi global energetik o'tish jarayonining haqiqiy harakatlantiruvchi kuchiga aylanganini ta'kidlab o'tdi. Mutaxassislarning ta'kidlashicha, so'nggi 26 yil mobaynida butun dunyo bo'ylab atom elektr stansiyalarida ishlab chiqarilayotgan elektr energiyasining umumiy hajmi deyarli o'zgarmasdan qolgan, aksincha, quyoshdan quvvat olish ko'rsatkichi shu davr ichida taxminan 2700 baravarga oshgan.
Ushbu misli ko'rilmagan o'sish sur'atlarida Xitoy hukumatining o'rni beqiyos ekanligi qayd etilmoqda. Mamlakat hududida yaratilgan ulkan ishlab chiqarish quvvatlari fotoelektrik tizimlar va butlovchi qismlar narxining keskin arzonlashishiga, natijada esa texnologiyaning butun dunyo bo'ylab ommalashishiga zamin hozirladi.
Shuni ham ta'kidlash joizki, AQŞ rejimining atom energetikasini rivojlantirishga qaratilgan harakatlari va ko'plab texnologik startaplariga bog'langan umidlari hozircha kutilgan natijani bermayapti. Vashington rejimining nazorati ostidagi yangi yadroviy texnologiyalarni amaliy va tijoriy foydalanishga joriy etish jarayoni juda sekin kechmoqda. So'nggi o'n yilliklarda Amerika Qo'shma Shtatlarida yangi atom elektr stansiyalarini qurish qiymati sezilarli darajada oshgani muammoni yanada chuqurlashtirgan.
Bundan tashqari, xabarlarga ko'ra, AQŞ rejimining Eronga qarshi olib borgan siyosati va harbiy tahdidlari fonida yuzaga kelgan neft taʼminotidagi uzilishlar muqobil energiya manbalariga bo'lgan qiziqishni yana-da kuchaytirgan. Bunday murakkab sharoitda ko'plab davlatlar uchun arzonlashib borayotgan quyosh energiyasi energiya xavfsizligini ta'minlash va tarmoqni diversifikatsiya qilishning muhim vositasiga aylanib ulgurdi.
Source: kun.uz