2025-yil oxiridagi so'nggi baholarga ko'ra, jahonning tasdiqlangan neft zaxiralari qariyb 1,8 trillion barrelni tashkil etgani xabar qilinmoqda. Ma'lumotlarga ko'ra, mamlakatlar orasida Venesuela 303,4 milliard barrel bilan yetakchilik qilmoqda, biroq katta zaxiraga egalik qilish amalda qazib olishda ham birinchi o'rinni anglatmasligi ta'kidlanmoqda.

Ushbu ma'lumotlar Visual Capitalist infografikasiga hamda Eni kompaniyasining World Energy Review 2026 hisobotiga asoslangan bo'lib, unda 2025-yil 31-dekabr holatidagi ko'rsatkichlar tahlil qilingan. Hisobotga ko'ra, Yaqin Sharq mintaqasi jahon zaxiralarining qariyb yarmini o'zida jamlagan holda mutlaq peshqadam bo'lib qolmoqda, garchi uning qazib olish hajmi boshqa mintaqalarga nisbatan turlicha bo'lsa-da.

Mintaqadagi yirik zaxiralar Saudiya Arabistoni (267,2 milliard barrel), Eron (208,6 milliard barrel), Iroq (145 milliard barrel) va Birlashgan Arab Amirliklarida (113 milliard barrel) to'plangani aytilmoqda. Biroq shunga qaramay, Yaqin Sharq qazib olish hajmi bo'yicha dunyoda ikkinchi o'rinda turib, 2025-yilda bu yerda kuniga qariyb 31 million barrel neft olingani taxmin qilinmoqda.

Mintaqaning eng yirik ishlab chiqaruvchisi bo'lgan Saudiya Arabistonida kunlik ko'rsatkich 9,6 million barrelni tashkil etgan, ammo mamlakatda ishlayotgan neft burg'ulash qurilmalari soni so'nggi 20 yildagi eng past darajaga tushgani ma'lum qilingan. Bu holat energetika investitsiyalarining tobora ko'proq tabiiy gaz qazib olishga yo'naltirilayotgani bilan izohlanmoqda.

Markaziy va Janubiy Amerika mintaqasi 354,8 milliard barrel yoki jahon zaxiralarining 19,7 foizi bilan ikkinchi o'rinni egallagan bo'lib, uning asosiy qismi Venesuelaga to'g'ri keladi. Shunga qaramay, Venesuela hukumati iqtisodiy muammolar, og'ir neftni qazib olish zarurati va infratuzilmaning yetarli darajada rivojlanmagani sababli o'z imkoniyatlarini to'liq ro'yobga chiqara olmayapti.

Source: kun.uz