Kosta-Rika Adliya vazirligi mamlakat poytaxti San-Xose yaqinida qurilgan o'ta xavfli jinoyatchilar uchun mo'ljallangan yangi yirik qamoqxonaga mahbuslarning ilk partiyasi qabul qilinganini ma'lum qildi. Ushbu muassasa mamlakatda jinoiy guruhlarga qarshi kurashish bo'yicha qat'iy chora-tadbirlar doirasida ish boshlagani aytilmoqda.

Vazirlik tomonidan e'lon qilingan suratlarda apelsin rangli kiyimdagi, boshi qirib tashlangan va qo'llarini ensasiga qo'yib o'tirgan 123 nafar mahbus tasvirlangan. Rasmiylarning iddao qilishicha, bu qamoqxona mamlakat penensiar tarixida yangi sahifa ochib, milliy xavfsizlikni ta'minlashda muhim qadam bo'ladi.

Uyushgan jinoyatchilikka qarshi yuqori saqlash markazi (CACCO) deb nomlangan ushbu majmua Salvador hukumati ko'magida qad rostlagan. Qiymati 35 million dollarni tashkil etuvchi mazkur obyekt 5 100 nafar mahbusni sig'dirish imkoniyatiga ega bo'lib, prezident Laura Fernandes rejimi tomonidan ilgari surilayotgan qattiq siyosatning ramzi sifatida taqdim etilmoqda.

Kosta-Rika uzoq yillar davomida Lotin Amerikasidagi eng xavfsiz davlatlardan biri sifatida e'tirof etib kelingan bo'lsa-da, so'nggi yillarda narkotik savdosi va uyushgan jinoyatchilik bilan bog'liq zo'ravonliklar keskin oshib ketdi. Xususan, mamlakatda 2023-yilda rekord darajadagi 905 ta qotillik qayd etilgan bo'lib, keyingi yillarda ham bu ko'rsatkich yuqoriligicha qolmoqda.

Source: www.aljazeera.com