Milliy statistika qo‘mitasi ma’lumotlariga ko‘ra, 2026-yil yanvar-mart oylarida O‘zbekistonning tashqi savdo aylanmasi 18 mlrd dollarni tashkil etib, o‘tgan yilning shu davriga nisbatan 471 mln dollarga yoki 2,7 foizga oshgan.

Biroq, eksport hajmi 29,3 foizga kamayib, 5,8 mlrd dollarni tashkil etdi. Bu pasayish asosan yil boshidan beri oltin eksporti amalga oshirilmagani bilan bog‘liq. O‘tgan yilning birinchi choragida 3,6 mlrd dollarlik oltin sotilgan bo‘lsa, bu yil oltin eksporti to‘xtatilgan.

Oltin eksportining to‘xtatilishi fonida salbiy savdo balansi deyarli olti baravarga oshib, 1,1 mlrd dollardan 6,4 mlrd dollargacha ko‘tarildi. Import hajmi esa 30,8 foizga o‘sib, 12,2 mlrd dollarni tashkil etdi.

Tashqi savdo aylanmasida eng katta ulush Xitoy (25,6 foiz), Rossiya (18,2 foiz), Qozog‘iston (7,2 foiz), Turkiya (3,6 foiz) va Afg‘oniston (2,8 foiz) hissasiga to‘g‘ri keldi. Xitoy bilan savdo hajmi 53,2 foizga, Rossiya bilan 23,2 foizga oshgan.

Eksport tarkibida tovarlar ulushi 59,9 foizni tashkil etib, sanoat tovarlari (17,8 foiz), kimyoviy vositalar (10,6 foiz), oziq-ovqat va tirik hayvonlar (9,2 foiz) yetakchi o‘rinda. Energiya resurslari eksporti 5,6 foizga kamayib, 243,8 mln dollarni tashkil etdi. Tabiiy gaz eksporti keskin qisqarib, chorak yakuniga ko‘ra atigi 36,7 mln dollarni tashkil etdi (61 foizga kam).

Xizmatlar eksporti 2,3 mlrd dollarni tashkil etib, 26,8 foizga o‘sdi. Turizm xizmatlari ulushi 48,0 foiz, transport 35,5 foiz, telekommunikatsiya va axborot xizmatlari 10,3 foizni tashkil etdi.

Importda Xitoy (32,5 foiz) va Rossiya (18,3 foiz) yetakchi bo‘lib, Qozog‘iston (8,4 foiz), Janubiy Koreya (3,7 foiz) va Turkiya (3,5 foiz) ham katta ulushga ega. Import tarkibida mashina va transport uskunalari (33,8 foiz), sanoat tovarlari (13,9 foiz) va kimyoviy mahsulotlar (12,0 foiz) ustunlik qiladi.

Mart oyida O‘zbekiston oltin importini keskin oshirib, chorak yakuniga ko‘ra 177,9 mln dollarlik oltin import qilindi (2,3 baravar ko‘p). Energiya resurslari importi 64,4 foizga o‘sib, 1,8 mlrd dollarni, gaz importi esa 2,2 baravarga ko‘payib, 360,5 mln dollarni tashkil etdi.

Xizmatlar importi 1,2 mlrd dollarni tashkil etib, 17,9 foizga o‘sdi. Safarlar (49,8 foiz), transport (19,8 foiz) va telekommunikatsiya xizmatlari (12,4 foiz) yetakchi o‘rinda.

Source: www.gazeta.uz