Toshkentning Mirzo Ulug‘bek tumanida “Mirzo Ulug‘bek tumangaz” bo‘linmasi xodimi fuqarodan binoni gaz tarmog‘iga ulash uchun 3 ming dollar talab qilgani aniqlandi.

Bosh prokuratura huzuridagi departament xodimlari tomonidan o‘tkazilgan maxsus operatsiya davomida ushbu firibgarlik sxemasiga chek qo‘yildi. Xodim fuqaroga gaz tarmog‘iga ulanishni rasmiylashtirish uchun 3 ming dollar evaziga yordam berishni va’da qilgan.

U yuqori lavozimli tanishlari orqali texnik hujjatlarni olishni tezlashtirish, shuningdek, ularga kerakli o‘zgartirish va qo‘shimchalar kiritish imkoniyatiga ega ekanligini da’vo qilgan.

Sxema doirasida summaning bir qismi – ming dollar vositachi orqali berilgan va u pora olish vaqtida qo‘lga olingan. Pullar moddiy dalil sifatida olib qo‘yilgan.

Ushbu fakt bo‘yicha Jinoyat kodeksining 168 (firibgarlik), shuningdek 28 va 211 (pora berish) moddalari bilan jinoyat ishi qo‘zg‘atilgan. Tergov harakatlari davom etmoqda.

Eslatib o‘tamiz, avvalroq Toshkentning Sergeli tumanida gaz ta’minoti tashkiloti xodimi 21 ming dollar pora olayotganda ushlangan edi. U biznesni ro‘yxatdan o‘tkazish va do‘konni gaz tarmog‘iga ulashda yordam berishni va’da qilgan.

Source: podrobno.uz