Farg‘ona viloyatida bir mansabdor shaxs abituriyentga oliy o‘quv yurtiga kirishda yordam berishni va’da qilib, undan 2 ming dollar talab qilgan. U pulni olayotgan vaqtda qo‘lga olingan.

Bosh prokuratura huzuridagi Iqtisodiy jinoyatlarga qarshi kurashish departamenti xabariga ko‘ra, maxsus operatsiya departament va huquqni muhofaza qiluvchi organlar xodimlari tomonidan o‘tkazilgan. Natijada Qo‘shtepa tumani bandlik va qashshoqlikni qisqartirish bo‘limi boshlig‘ining o‘rinbosari ushlangan.

Tergov ma’lumotlariga ko‘ra, mansabdor shaxs abituriyentni Andijon viloyatidagi oliy o‘quv yurtlaridan biriga nufuzli tanishlari orqali kiritishni va’da qilgan. Buning evaziga u 2 ming dollar talab qilgan.

Erkak kishi kelishilgan summani olayotgan vaqtda qo‘lga olingan. Unga nisbatan firibgarlik va pora berish bilan bog‘liq moddalar bo‘yicha jinoyat ishi qo‘zg‘atilgan. Hozirda tergov harakatlari olib borilmoqda.

Avvalroq Toshkentda abituriyentga oliy o‘quv yurtiga kirishda yordam berish bahonasida katta miqdorda pul undirgan firibgar ayol qo‘lga olingan edi.

Source: podrobno.uz