Farg‘ona viloyati bojxona boshqarmasi xodimlari Xitoydan mahalliy kompaniya manziliga yetkazilgan yirik yuk partiyasini tekshirish chog‘ida 16 tonnaga yaqin deklaratsiyalanmagan yoki noto‘g‘ri nomlangan tovarlarni aniqladi.

“Qo‘qon” bojxona posti xodimlari kontrabandaga qarshi kurash bo‘limi bilan hamkorlikda Xitoydan keltirilgan yukni tekshirdi. Hujjatlarga ko‘ra, umumiy og‘irligi 25 tonna bo‘lgan 14 turdagi tovarlar erkin muomalaga chiqarish bojxona rejimiga rasmiylashtirish uchun taqdim etilgan edi.

Kompaniya vakili ishtirokida o‘tkazilgan ko‘rik natijasida tovarlarning bir qismi deklaratsiyada ko‘rsatilmagani, bir qismi esa boshqa nomlar bilan yozilgani ma’lum bo‘ldi. Tekshiruv davomida 7 xil turdagi, qiymati 2 milliard so‘mdan ortiq bo‘lgan 16 tonna tovar aniqlangan.

Barcha mahsulotlar olib qo‘yilgan. Hozirda tergovgacha tekshiruv olib borilmoqda. Eslatib o‘tamiz, avvalroq “Sergeli” bojxona postida akustik tizimlar va elektron sigaretlarning tegishli hujjatlarsiz partiyalari ushlangan edi.

Source: podrobno.uz