Markaziy bank O‘zbekistonning to‘lov infratuzilmasi holati to‘g‘risida 2026-yil 1-iyun holatiga ma’lumot e’lon qildi. Hisobotga ko‘ra, mamlakatda 73,6 million bank kartalari muomalada bo‘lib, yilning dastlabki besh oyida to‘lov terminallari orqali tushumlar hajmi 256,8 milliard so‘mga yetgan.

Regulyator ma’lumotlariga ko‘ra, respublikada 445 mingdan ortiq to‘lov terminallari va qariyb 46,5 ming bankomat hamda infokiosklar o‘rnatilgan.

Eng ko‘p bank kartalarini Xalq bank chiqargan – 11,8 million dona. Undan keyin Uzum Bank (6,8 million), Agrobank (6,7 million), Ipoteka-bank (5,6 million) va Hamkorbank (4,9 million) joylashgan.

To‘lov terminallari soni bo‘yicha yetakchi Hamkorbank bo‘lib, u 65 mingga yaqin qurilma o‘rnatgan. Uchlikka Milliy bank (42 ming terminal) va Xalq bank (34 ming terminal) ham kirgan.

Bankomat va infokiosklar soni bo‘yicha Xalq bank birinchi o‘rinda – 3 132 ta qurilma. Undan keyin Agrobank (1 823) va Kapitalbank (1 664) bor.

Yanvar-may oylarida terminallar orqali eng katta tushum Aloqabankda qayd etilgan – 28,4 milliard so‘m. Keyingi o‘rinlarda Milliy bank (21,6 milliard so‘m) va TBC Bank (17 milliard so‘m) turadi. Yetakchilar qatoriga Ipoteka-bank, Hamkorbank, Ipak Yo‘li Bank va Xalq bank ham kirgan.

Shu bilan birga, raqamli banklar minimal jismoniy infratuzilma bilan yuqori ko‘rsatkichlarni namoyish etmoqda. TBC Bank atigi 40 terminal va bitta bankomatga ega bo‘lib, 17 milliard so‘mdan ortiq aylanmani ta’minlagan. Uzum Bank esa o‘zining to‘lov terminallari tarmog‘iga ega bo‘lmagan holda 13,7 milliard so‘mlik operatsiyalar hajmini ko‘rsatgan.

Eslatib o‘tamiz, avvalroq O‘zbekistonda o‘z bank kartalari o‘rtasidagi pul o‘tkazmalari uchun komissiyani bekor qilish mumkinligi haqida xabar berilgan edi.

Source: podrobno.uz