O‘zbekiston Respublikasi Istiqbolli Loyihalar Milliy Agentligi (NAPP) qaroriga muvofiq, “Kapitalbank” ATB va “Kapital Securities” MChJ O‘zbekiston Respublikasi kapital bozori sohasidagi maxsus huquqiy rejim “Regulyator qum qutisi”ga xorijiy valyutadagi obligatsiyalar emissiyasi va muomalasi yo‘nalishi bo‘yicha birinchi ishtirokchilar sifatida qo‘shildi.

Ushbu yo‘nalish maxsus huquqiy rejim doirasida amalga oshirilmoqda, bu birinchi marta xorijiy valyutadagi obligatsiyalar emissiyasi va muomalasi mexanizmlarini sinovdan o‘tkazish va amaliy qo‘llashni nazarda tutadi. Maqsad – O‘zbekiston Respublikasi kapital bozorida moliyalashtirish vositalarini takomillashtirish, investitsiya imkoniyatlarini kengaytirish va moliya bozori likvidligini oshirish.

Maxsus huquqiy rejim doirasida “Kapitalbank” ATB va “Kapital Securities” MChJ O‘zbekistonda xorijiy valyutadagi obligatsiyalar chiqarish bilan bog‘liq loyihalarni amalga oshirish imkoniyatini ko‘rib chiqmoqda. Bu ularning emissiyasi va muomalasiga alohida yondashuvlarni amalda ishlab chiqish, shuningdek, xalqaro amaliyot va bozor ishtirokchilari ehtiyojlarini hisobga olgan holda kapital bozori infratuzilmasini yanada takomillashtirish bo‘yicha takliflar shakllantirish imkonini beradi.

“Kapital Securities” MChJ direktori Georgiy Paresishvili ta’kidladi: “Maxsus huquqiy rejimda ishtirok etish bizga o‘zbek kompaniyalari uchun kapital bozori orqali qarz moliyalashtirishning yangi mexanizmlarini ishlab chiqish, shuningdek, investitsiya vositalarini kengaytirish va mahalliy qimmatli qog‘ozlar bozori likvidligini oshirish uchun qo‘shimcha imkoniyatlar yaratish imkonini beradi. Biz ushbu mexanizmlarni amalga oshirish mamlakat iqtisodiyotiga xorijiy valyutadagi moliyaviy resurslarni investitsiya qilishga tayyor bo‘lgan mahalliy va xorijiy investorlarning yangi toifasini jalb qilishga, shuningdek, O‘zbekiston Respublikasi kapital bozori infratuzilmasini yanada rivojlantirishga xizmat qiladi deb hisoblaymiz.”

Source: uznews.uz