Namangan viloyati Davlat xavfsizlik xizmati boshqarmasi xodimlari viloyat bojxona boshqarmasi bilan hamkorlikda o‘tkazgan tezkor tadbir davomida yirik narkotik kontrabanda kanalini to‘sdi. Giyohvand moddalar noqonuniy muomaladan olib qo‘yildi.

Maxsus operatsiya davomida Pop tumanidagi “Namangan” yo‘l-patrul postida Toshkent–Namangan yo‘nalishida harakatlanayotgan Cobalt avtomobili to‘xtatilib, tekshirildi. Tekshiruv natijasida 1989-yilda tug‘ilgan, ilgari sudlangan namanganlik yo‘lovchining sumkasidan 3 kilogramm 956 gramm hashish topildi. Narkotiklar hujjatlashtirilib, ashyoviy dalil sifatida olib qo‘yildi.

Tergovga qadar tekshiruv davomida ushlangan shaxs o‘zining 1989-yilda tug‘ilgan, ilgari sudlangan sherigi va hamyurti bilan til biriktirgani aniqlangan. Jinoyatchilar bu yirik partiyadagi narkotikni qo‘shni davlatdan rasmiy o‘tish punktlarini chetlab o‘tib, kontrabanda yo‘llari orqali olib kelishgan. Ikkinchi sherik ham protsessual tartibda qo‘lga olingan.

Hozirda narkotrafikchilarga nisbatan jinoyat ishi qo‘zg‘atilgan, tergov harakatlari olib borilmoqda. Huquq-tartibot organlari fuqarolarni bunday huquqbuzarliklarga duch kelganda DXXning 1520 qisqa raqamiga anonim tarzda xabar berishlari mumkinligini eslatadi. Shaxsning maxfiyligi kafolatlanadi.

Source: podrobno.uz