O‘zbekiston Prezidenti Shavkat Mirziyoyev 29-iyun kuni Jahon banki delegatsiyasini qabul qildi. Delegatsiyaga bankning Yevropa va Markaziy Osiyo mintaqasi bo‘yicha vitse-prezidenti Antonella Bassani rahbarlik qildi. Uchrashuvda ikki tomonlama strategik sheriklikni yanada rivojlantirish masalalari ko‘rib chiqildi.

So‘nggi yillarda Jahon banki bilan hamkorlik misli ko‘rilmagan darajaga yetdi. Qo‘shma loyihalar portfeli 15 milliard dollardan oshdi. Toshkentda bankning mintaqaviy ofisi muvaffaqiyatli faoliyat yuritmoqda, yangi moliyalashtirish vositalari joriy etilmoqda.

Tomonlar 2023-yil sentyabr oyida Nyu-Yorkda Shavkat Mirziyoyev va Jahon banki prezidenti o‘rtasidagi uchrashuvda erishilgan kelishuvlar izchil amalga oshirilayotganini mamnuniyat bilan qayd etdi.

Uchrashuvda Jahon banki rahbariyatining bo‘lajak tashriflariga tayyorgarlik ko‘rish va yangi uzoq muddatli Mamlakat hamkorlik dasturini ishlab chiqishga alohida e’tibor qaratildi.

Ustuvor yo‘nalishlar sifatida kichik va o‘rta biznesni qo‘llab-quvvatlash, qashshoqlikni qisqartirish dasturlari, davlat korxonalarini xususiylashtirish, iqtisodiyotga sun’iy intellekt texnologiyalarini joriy etish, suv sektoridagi loyihalarni moliyalashtirish, inson kapitalini rivojlantirish va O‘zbekistonning xalqaro reytinglardagi o‘rnini yaxshilash belgilandi.

Source: podrobno.uz