Тошкентнинг “Бунёдкор” клуби Суперлига доирасидаги ўйинга йўл ола олмаслигини эълон қилганидан бир неча кун ўтиб, 5 миллиард сўм миқдорида молиявий ёрдам олди. Бу ҳақда клуб расмий хабар берди.

Клуб маълумотига кўра, маблағ Ўзбекистон Президентининг 2026 йил 24 мартдаги қарори асосида ажратилган бўлиб, у спортни молиялаштириш механизмларини такомиллаштириш ва бизнесни жалб қилишга қаратилган. “Бунёдкор” раҳбарияти энди жамоа чемпионатдаги яқин ўйинларга тайёргарликни режа асосида давом эттиришини билдирди.

Аввалроқ “Бунёдкор” Профессионал футбол лигасига хат йўллаб, 2 августга белгиланган Суперлига 15-турида Навоий вилоятида “Қизилқум”га қарши ўйинга бора олмаслигини маълум қилган эди. Сабаб сифатида молиявий муаммолар – чипта, меҳмонхона ва овқатланиш учун маблағ йўқлиги кўрсатилди.

Регламентга кўра, келмаганлик учун жамоага техник мағлубият ёзилиши, такрорланса, турнирдан четлаштириш масаласи кўриб чиқилиши мумкин эди. Бу ҳолат клуб учун жиддий хавф туғдирган.

“Бунёдкор”нинг молиявий қийинчиликлари мухлислар норозилигига сабаб бўлмоқда. Июль ойида жамоа мухлислари ўйин вақтида “Aliyev Out” баннерини кўтариб, бош директор Мурод Алиевнинг истеъфосини талаб қилган эди. Бу клубдаги кўп йиллик молиявий ва бошқарув муаммоларига норозилик эди.

Энг катта муаммолардан бири – собиқ футболчилар Ривалдо ва Денилсон олдидаги катта қарз. 2024 йилда ФИФА интизомий қўмитаси “Бунёдкор”ни уларга тахминан 9,2 миллион евро тўлашга мажбур қилган. Қарз Zeromax компанияси даврида пайдо бўлган.

Кейинчалик клуб Ривалдо билан қарзни 2028 йилгача босқичма-босқич тўлашга келишган, аммо жадвал бажарилмади. “Ўзбекнефтегаз” молиялаштиришни тўхтатгач, навбатдаги тўлов амалга ошмади ва ФИФА ҳолат ҳал бўлмагунча янги футболчиларни рўйхатдан ўтказишни тақиқлади.

Шу билан бирга, клуб ичида ҳам молиявий қийинчиликлар давом этмоқда: футболчилар ва ходимлар бир неча ойдан бери иш ҳақи олмаган, янги молия манбасини топиш масаласи ҳали ҳам очиқ қолмоқда.

Source: podrobno.uz