O‘zbekiston eksportchilari AQShning yirik chakana savdo tarmog‘i Costco Wholesale vakillari bilan muzokaralar o‘tkazdi. Uchrashuvda O‘zbekistonning eksport salohiyati, shuningdek, AQSh bozoriga olib kirishga ruxsat etilgan mahalliy mayiz va quritilgan o‘rik namunalari taqdim etildi.

Costco vakillari o‘zbek mayizining sifati va tashqi ko‘rinishini yuqori baholab, uni tarmoq do‘konlarida sotish imkoniyatini ko‘rib chiqishga tayyor ekanliklarini bildirdi. Bu O‘zbekiston qishloq xo‘jaligi mahsulotlari uchun AQSh bozorida katta imkoniyatlar yaratishi mumkin.

Muzokaralar davomida, shuningdek, O‘zbekistondan pista, yong‘oq, bodom, ko‘k meva, gilos, uzum, anor va boshqa yangi hamda quritilgan mevalarni yetkazib berish istiqbollari muhokama qilindi. Ushbu mahsulotlar AQSh bozorida yuqori talabga ega.

Costco Wholesale AQShning eng yirik ulgurji va chakana savdo tarmoqlaridan biri bo‘lib, uning savdo maydonchalariga chiqish O‘zbekiston eksportini sezilarli darajada kengaytirishi mumkin. Bu O‘zbekiston qishloq xo‘jaligi mahsulotlarining jahon bozoridagi o‘rnini mustahkamlashga xizmat qiladi.

Source: uznews.uz