Toshkent shahrida aktyor va bloger Musulmon Yunusovning qizi uchun nogironlik guvohnomasini rasmiylashtirishda shifokor 300 dollar pora talab qilgani haqidagi bayonoti yuzasidan huquqni muhofaza qilish organlari tomonidan tekshiruv boshlandi. Bu holat ijtimoiy tarmoqlarda keng muhokamalarga sabab bo‘ldi.
Yunusovning so‘zlariga ko‘ra, u uzoq vaqt davomida voyaga yetmagan qiziga tegishli nogironlik maqomini rasmiylashtira olmagan. Poliklinika shifokori esa buning evaziga undan 300 dollar talab qilgan. Aktyor bu haqda ochiq e’lon qilganidan so‘ng, huquqni muhofaza qilish organlari ishni o‘rganishga kirishdi.
Shu bilan birga, Milliy ijtimoiy himoya agentligi maxsus ishchi guruh tuzib, 3-sentabr kuni qizni qayta tibbiy ko‘rikdan o‘tkazdi. Ekspertlar tibbiy hujjatlarni qayta o‘rganib, bolaning haqiqiy holatini baholab, uni 18 yoshgacha nogiron deb tan oldi va doimiy tashqi parvarishga muhtojligini tasdiqladi.
Agentlik ma’lumotiga ko‘ra, otaning arizasi 18-may kuni 71-sonli oilaviy poliklinikada qabul qilingan. 21-may kuni hujjatlar elektron shaklda hududiy tibbiy-ijtimoiy ekspert komissiyasiga (TIEK) yuborilgan. 5-iyun kuni Sergeli tumanlararo TIEK №127 qizni 18 yoshgacha nogiron bola deb tan olib, tashqi parvarishga muhtoj deb topgan.
Keyinchalik bu xulosa elektron tanlab tekshiruvdan o‘tkazilgan. Samarqand viloyati TIEK eksperti hujjatlarni qayta o‘rganib, tashqi parvarish zarurligini xulosadan chiqarib tashlagan. Natijada qizning nogironlik maqomi saqlanib qolgan, biroq tashqi parvarishga bo‘lgan ehtiyoj bekor qilingan.
Agentlik ta’kidlashicha, Sergeli tumanlararo TIEK №127 qayta tekshiruv natijalarini to‘liq o‘rganmagan. Tekshiruv yakuniga ko‘ra, ushbu TIEK va “Inson” markazi rahbarlari hamda xodimlariga nisbatan intizomiy choralar ko‘rilgan, jumladan, ishdan bo‘shatishgacha yetkazilgan. Biroq agentlik kimlar aniq ishdan bo‘shatilgani va qancha xodim javobgarlikka tortilgani haqida ma’lumot bermagan.
Source: podrobno.uz