O‘zbekiston Prezidenti Shavkat Mirziyoyev Janubiy Koreyaga davlat tashrifi doirasida «The Chosun Ilbo» nashrida chop etilgan maqolasida Samsung, LG, Hyundai, Kia, Lotte kabi yirik koreys korporatsiyalarini importdan to‘liq sikl ishlab chiqarishga ega lokalizatsiya qilingan yuqori texnologiyali xablarga o‘tishni taklif qildi. Bu tashabbus ikki davlat hamkorligini «yangi Buyuk Ipak yo‘li» darajasiga ko‘tarishi va yuqori texnologiyalar, sanoat hamda muhim minerallarni qayta ishlash sohalarida chuqur integratsiyani ta’minlashi kutilmoqda.
Prezident o‘z maqolasida Toshkent va Seulning iqtisodiy manfaatlari bir-biriga to‘liq mos kelishini ta’kidladi: O‘zbekiston jahon qo‘shilgan qiymat zanjirlariga chuqur kirib borishga intilsa, Janubiy Koreya resurslar yetkazib berishni diversifikatsiya qilish va barqaror bozorlarga ega bo‘lishdan manfaatdor. Ushbu strategik qarash ikki tomonlama munosabatlarning uzoq muddatli istiqbolini belgilab beradi.
Maqolada ta’kidlanishicha, hamkorlik poydevori allaqachon mustahkam: Koreya investitsiyalari hajmi 8 milliard dollardan oshgan, mamlakatda 700 dan ortiq qo‘shma loyiha amalga oshirilmoqda, o‘zaro tovar aylanmasi so‘nggi yillarda besh barobar o‘sgan. KOICA va Koreya Eksimbanki (EDCF) orqali qo‘shma dasturlar 3,5 milliard dollardan oshdi, O‘zbekiston mintaqada birinchi bo‘lib janubiy koreys tezyurar poyezdlarini xarid qilgan davlatga aylandi.
Texnologik xablar uchun ustuvor yo‘nalishlar qatorida sun’iy intellekt, yarimo‘tkazgichlar, mikroelektronika, elektromobil ishlab chiqarish, robototexnika, biofarmatsevtika va «aqlli» qishloq xo‘jaligi ko‘rsatilgan. O‘zbekistonning boy resurslarini Seulning ilg‘or texnologiyalari bilan birlashtirish orqali yangi yetkazib berish zanjirlarini yaratishga alohida e’tibor qaratilgan.
Prezident inson kapitalini rivojlantirish muhimligini ham qayd etib, akademik almashinuvlarni kengaytirish, R&D markazlarini ochish va kadrlarni birgalikda tayyorlash zarurligini ta’kidladi. U o‘zbek xalq maqolini — «Bir ot chang chiqarmas» — koreys donoligi bilan qiyoslab, birgalikdagi mehnat har qanday vazifani yengillashtirishini aytdi.
Shuningdek, maqolada ikki xalqning madaniy yaqinligi, umumiy qadriyatlar, Seulning Koreya yarim orolida tinchlik o‘rnatishga qaratilgan sa’y-harakatlarini qo‘llab-quvvatlash, shuningdek, janubiy koreyslarni Samarqand, Buxoro, Xiva, Termiz va Toshkentga shaxsan taklif qilish kabi mavzular yoritilgan. Tashrif doirasida Shavkat Mirziyoyev Prezident Li Chje Myon bilan muzokaralar o‘tkazadi va 16 sentabr kuni «Markaziy Osiyo – Koreya Respublikasi» birinchi sammitida ishtirok etib, Seul deklaratsiyasini qabul qilish rejalashtirilgan.
Source: podrobno.uz