Toshkent shahrida ijtimoiy tarmoqlarda "Chorsu" bozoridagi sayyohlarga nisbatan tajovuzkor xatti-harakatlari bilan mashhur bo'lgan ko'cha xonandasi Bozorboy IIBga olib kelindi. Bu haqda Milliy gvardiya xabar berdi.

Ma'lum qilinishicha, 17-sentabr kuni soat 17:00 atrofida tadbirkorlar tomonidan "Eski Jo'va" bozori hududida voyaga yetmagan shaxsning pul so'rashi haqida murojaat kelib tushgan. Bozorda jamoat tartibini saqlash uchun jalb qilingan Milliy gvardiya harbiy xizmatchisi bolani aniqlab, uni bozor hududidagi IIB binosiga olib kelgan va profilaktika xizmati xodimlariga topshirgan.

Tekshiruv davomida aniqlanishicha, bola tadbirkorlar va fuqarolardan, jumladan sayyohlardan ham pul so'ragan. To'lashdan bosh tortganlarni esa haqorat qilib, bezovta qilishda davom etgan. Avvalroq ijtimoiy tarmoqlarda uning "Chorsu" bozorida chet ellik mehmonlarga qo'shiq aytib, so'ngra 100 ming so'm talab qilgani aks etgan video keng muhokamalarga sabab bo'lgan edi. Sayyoh 50 ming so'm taklif qilganda, bola uning qo'lidan 150 ming so'mni tortib olgan.

Hozirda profilaktika xizmati xodimlari tomonidan tekshiruv o'tkazilib, voqea holatlari aniqlanmoqda. Milliy gvardiya ma'lumotlariga ko'ra, bu holat bozor savdogarlari va tashrif buyuruvchilar o'rtasida jiddiy norozilik keltirib chiqargan.

Source: podrobno.uz