3-oktabr kuni kechki payt Buxoro viloyatidagi eng yirik savdo majmualaridan biri hisoblangan «Karvon» bozorida yong‘in chiqdi. Viloyat Favqulodda vaziyatlar boshqarmasiga hodisa to‘g‘risidagi dastlabki xabar soat 21:49 da kelib tushgan bo‘lib, voqea joyiga zudlik bilan qutqaruv xizmatlari yo‘naltirildi.

Yong‘in-qutqaruv bo‘linmalari ko‘rsatilgan manzilga tezkorlik bilan yetib borib, alanganing bozor hududidagi boshqa savdo rastalari va do‘konlarga tarqalib ketishining oldini olish choralarini ko‘rdi. Qutqaruvchilarning sa’y-harakatlari natijasida olov soat 23:45 da qurshab olinib, mahalliylashtirildi, tungi soat 00:12 da esa yong‘in to‘liq bartaraf etildi.

Dastlabki rasmiy ma’lumotlarga ko‘ra, yuz bergan favqulodda hodisa oqibatida fuqarolar orasida tan jarohati olganlar yoki halok bo‘lganlar qayd etilmagan. Hozirgi paytda mutasaddi idoralar tomonidan yong‘inning kelib chiqish sabablari o‘rganilmoqda va tadbirkorlarga yetkazilgan moddiy zarar miqdori aniqlanmoqda.

Source: uznews.uz