Davlat xavfsizlik xizmatining Toshkent shahri va Andijon viloyati boshqarmalari xodimlari tomonidan o'tkazilgan tezkor tadbir davomida yirik miqdordagi qalbaki pul vositalarini tayyorlash bilan shug'ullanib kelgan shaxsning noqonuniy faoliyatiga chek qo'yildi. Rasmiy manbalarning ma'lum qilishicha, asakalik gumonlanuvchi o'z uyida soxta kupyuralar ishlab chiqarishni yo'lga qo'ygan.

Ma'lum bo'lishicha, muqaddam firibgarlik jinoyati uchun sudlangan 39 yoshli Asaka tumani aholisi vakili shartli xaridorga qalbaki pullarni sotish chog'ida ashyoviy dalillar bilan qo'lga olingan. Jinoyat rejasiga ko'ra, u umumiy qiymati 297 million so'mlik 100 ming va 200 ming so'mlik soxta banknotlarni 148 million so'm haqiqiy pulga sotishni ko'zlagan.

Tezkor tadbir davomida gumonlanuvchining yashash xonadonida ko'zdan kechirish ishlari olib borildi. Natijada, qalbaki pul yasalishida foydalanilgan maxsus texnik jihozlar, shuningdek, 50 ming va 100 ming so'mlik nominaldagi tayyor hamda yarim tayyor holatdagi soxta kupyuralar protsessual tartibda rasmiylashtirilib olib qo'yildi.

Mazkur holat yuzasidan O'zbekiston Respublikasi Jinoyat kodeksining 176-moddasi (qalbaki pul, aksiz markasi yoki qimmatli qog'ozlar yasash, ularni o'tkazish) 3-qismining 'a' bandi bilan jinoyat ishi qo'zg'atilgan. Hozirgi vaqtda tergov harakatlari davom etmoqda.

Source: uznews.uz